एजेन्सी – इटाली राष्ट्रिय फुटबल टोलीका पूर्व कप्तान फावियो कानाभारो युरोपियन फुटबल सिजन सकिनुअघि फुटबल पुरानै अवस्थामा सञ्चालन हुन कठिन रहेको बताएका छन् । कोरोना भाइरस कोभिड १९ को महामारीले विश्व भर असर पारेकाले विश्वको फुटबल गतिविधि ठप्प छ ।

चिनिया क्लब गोन्जाउ एभरग्रान्डेका प्रशिक्षक कानाभारोले युरोपका घरेलु फुटबल पुनः सञ्चालन हुनका लागि निकै समय लाग्न सक्ने अनुमान गरे । ‘अबको महिना दिनमा विश्वमा के हुन्छ भन्न सकिने अवस्था छैन । मलाई लाग्छ इटाली र स्पेनामा यो कोरोनोको असर लामो समय सम्म पर्न सक्छ ,’ उनले भने, ‘त्यसैले यो सिजनको अन्त्य (मे महिना ) अघि युरोपियन फुटबल पुरानै अवस्थामा आउन कठिन छ । ‘

चीनमा कोरानाको अवस्थाका बारेमा उनले भने, ‘गोन्जाउमा यसको अवस्था नियन्त्रणमा छ । जन जीवन सामान्य अवस्थामा फर्कने अवस्थामा छ । १४ दिन घरमा बस्ने बाहेक अरु कुनै बाधा छैन । दुई दिन अघि मात्र मेरो पनि क्वारेन्टाइन बसाई सकिएको हो । जो पनि घर बाहिरबाट घर फर्कनु भएको छ सबैले यो अपनाउनु पर्नेछ ।’

घरमा बस्नु यो संक्रमण लाग्न नदिन र लागि हाले पनि फैलन नदिने सबै भन्दा उत्तम विकल्प भएको कानाभारो बताएका छन् । उनले थपे, ‘यस्तो कठिन अवस्थामा के गर्ने भन्ने चीनबाट सिक्नुपर्दछ । चीनसँग यसको राम्रो अनुभव छ ।’ विश्व भर ४ लाख भन्दा बढीमा कोरोना भाइरसको संक्रमण देखिएको छ भने १७ हजार बढीको मृत्यु भइसकेको छ ।