एजेन्सी – कोराना भाइरसको संक्रमणले अहिले विश्वभर लगभग सबै क्षेत्र ठप्प जस्तै छ । यसको असर युरोपियन क्लबहरुको आर्थिक अवस्थामा परेको छ । यसैलाई मध्यनजर गर्दै बार्सिलोनाले कप्तानहरुसँग खेलाडीको तलब कटौती गर्ने विषयमा छलफल गर्दैछ ।

स्पेनलगायत विश्वभरका सबै फुटबल गतिविधि यति बेला स्थगित छ । यसले क्लबको आम्दानीमा पनि असर गरेको छ । बार्सिलोना बुधबार बस्ने बोर्ड बैठकले सिजनको अन्त्यसम्मका लागि खेलाडीको तलब कटौती गर्ने विषयमा छलफल गर्दैछ । बोर्ड बैठकपछि टोलीका कप्तान मेस्सीसहित अन्य उपकप्तानसँग छलफल गर्ने भएको छ । मेस्सीसँगै सर्जियो बुस्केट्स, जेरार्ड पिके र सर्जी रोबर्टोले छलफलमा भाग लिने बुझिएको छ ।

स्पेनिस संचारमाध्यम मार्साका अनुसार खेलाडीले पनि तलब कट्टाको विषयलाई सकारात्मक रुपमै लिएका छन् । यद्यपि कहिले सम्म यो अवस्थाले निरन्तरता पाउने भन्ने यकिन नहुँदा छलफलबाट निर्णय हुनेछ । ला लिगा र च्याम्पियन्स लिग यहि अवस्थामा रद्द भएको खण्डमा सम्भवत त्यसले क्लबहरुलाई ठूलो आर्थिक घाटा पर्ने सम्भावना रहन्छ ।

अहिले युरोपका ठूला प्रतियोगिता स्थगित छन् । यद्दपी ला लिगा र च्याम्पियन्स लिग जसोतसो अन्त्य गर्न सक्ने विश्वास गरिएको छ । तर, अहिलेको अवस्था हेर्दा कुनै पनि विषयमा यकिन गर्ने अवस्था भने छैन । यदि सोचे अनुरुप प्रतियोगिता हुन सकेन भने टिभी राइटबाट आउने ठूलो रकम क्लबले पाउने छैनन् ।

ला लिगा तथ्यांक : मेस्सी, क्यासेमिरो र बुस्केट्स अग्रतामा