एजेन्सी – स्पेनिस महारथी रियल म्याड्रिडका मिडफिल्डर मार्को एसेन्सियोले ला लिगा फिफा २० च्यालेन्ज प्रतियोगिताको उपाधि जितेका छन् । ला लिगा क्लबबाट १-१ प्रतिनिधि सम्मिलित यस भर्चुअल गेम, फिफा २० प्रतियोगिता स्पेनका इबाई लानोसले आयोजना गरेका थिए ।

एसेन्सियोले फाइनलमा लेगानेसका आइटर रुइबाललाई ४-२ ले पराजित गर्दै उपाधि जितेका हुन् । विश्वभर फैलिरहेको कोरोनाले गर्दा खेलकुद गतिविधि ठप्प भएपछि दर्शकलाई मनोरंजनका साथसाथै जनचेतना जगाउन प्रतियोगिताको आयोजना गरिएको थियो । यसक्रममा युनिसेफका लागि १ लाख ४० हजार युरो समेत उठिसकेको छ । दर्शकहरुले आजसम्म यसमा योगदान गर्न सक्नेछन् ।

एसेन्सियो हाल चोटका कारण मैदानबाहिर रहेका छन् । उनले भर्चुअल गेममा भने रियललाई उपाधि दिलाउन सफल रहे । एसेन्सियोले प्रतियोगितामा सहभागी सबैलाई धन्यवाद दिँदै दर्शकहरुमा आभार व्यक्त गरे । ‘ प्रतियोगिता निकै राम्रो रहयो । हाम्रो लक्ष्य सबैलाई मनोरंजन दिँदै जनचेतना जगाउने र सहयोग गर्ने थियो । त्यसमा हामी सफल भएका छौं,’ २४ वर्षीय मिडफिल्डरले भने ।

प्रतियोगितामा बार्सिलोनाले भने सहभागिता जनाएन । बार्सिलोना कोनामीले निर्माण गर्ने प्रो इभोलुसन सकर (पीईएस) को अधिकारिक क्लब भएकाले यस प्रतियोगिता खेल्न मानेन । बार्सिलोनाबाट सर्जी रोबर्टोले खेल्ने तय रहेपनि अन्तिम समयमा प्रायोजकको कारण देखाउँदै क्लबले भाग लिन मानेन । ईए स्पोर्ट्सको फिफा र कोनामीको पीईएस बजारी प्रतिद्वन्द्वी हुन् ।

अन्तिम १६:

ओसासुना (रुबेन गार्सिया) ०-२ लेगानेस (आइटर रुइबाल)

सेभिल्ला (सर्जियो रेगुलिओन) १-२ एथलेटिक क्लब (गोरका गुरुजेता)

लेभान्ते (कार्लोस क्लेर्क) २-३ अलाभेस (लुकास पेरेज)

रियल सोसीडाड (अदनान जानुजाज) ३-५ एटलेटिको म्याड्रिड (मार्कस लोरेन्टे)

गेटाफे (जेसन रेमेसिरो) १-७ रियल बेटिस (बोर्जा इग्लेसेस)

भिल्लारियल (मानु मोर्लानेस) ४-२ भ्यालेन्सिया (कार्लोस सोलेर)

ग्रानाडा (जोसे मार्टिनेज) ०-२ रियल म्याड्रिड (मार्को एसेन्सियो)

बार्सिलोना (सर्जी रोबर्टो) – एइबार (एडुएक्स्पोजितो) (बार्सिलोनाको वाकोभर)

क्वाटरफाइनल :

लेगानेस ७-३ एथलेटिक क्लब

अलाभेस २-१ एटलेटिको म्याड्रिड

एइबार ३-२ रियल बेटिस

भिल्लारियल १-५ रियल म्याड्रिड

सेमिफाइनल :

लेगानेस ३-२ अलाभेस

एइबार ०-७ रियल म्याड्रिड

फाइनल :

लेगानेस २-४ रियल म्याड्रिड