एजेन्सी – इटालियन जाइन्ट युभेन्टसले आफ्ना भेट्रान गोलरक्षक जियानलुजी बुफोनसँगको सम्झौता नवीकरण गर्ने निर्णय गरेको छ । बुफोनसँगै युभेन्टसले भेट्रान डिफेन्डर जर्जियो किएलीनी र ब्लेइस माटुइडीसँग पनि सम्झौता नवीकरण गर्ने निर्णय गरेको छ ।

४२ वर्षीय भेट्रान गोलरक्षक बुफोनसँगै  यि तिनै जनाको सम्झौता आउदो जुनसम्म रहेको थियो । तर, युभेन्टसले बुफोनसँगै  यि तिनै जनाको सम्झौता एक वर्ष थप्ने निर्णय गरेको हो । फ्रेन्च लिग पेरिस सेन्ट जर्मेन (पीएसजी) छाडेर युभेन्टस आएयता बुफोनले यो सिजन ११ खेल खेलेका छन् । उनी अझै पनि सन्यासको मुडमा छैनन् । अन्तर्राष्ट्रिय फुटबलबाट संन्यास लिएपनि बुफोनले पिएसजीबाट फ्रेन्च लिग जितेर युभेन्टस आएका हुन् ।

यस्तै सेन्टर ब्याक किएलीनी २००५ यता निरन्तर युभेन्टसमै रहेका छन् । चोटका कारण किएलीनीले यो सिजन जम्मा ३ खेलमा मात्रै मौका पाएका छन् । उनी अहिले चोटबाट पुर्ण रुपमा फिट छन् । टोलीको कप्तानी समेत गरिरहने किएलिनी मध्य डिफेन्समा बलिया खेलाडी मानिन्छन् । उनले लिओनार्डो बोनुचीसँग साझेदारी गर्दै आएका छन् ।

सन् २०१७ मा युभेन्टस आएका माटुइडीले यो सिजन ३१ खेल खेलेका छन् । माटुइडी पनि पिएसजीबाट नै इटालियन च्याम्पियनसँग जोडिएका थिए । अहिले ब्लेइस माटुइडी, ड्यानियल रुगानी र पाउलो डिबालामा कोरोनाको संक्रमण भेटिएको छ । उनीहरु अहिले चिकित्सकको निगरानीमा रहेका छन् ।

इटालियन लिग हाललाई अप्रिल पहिलो सातासम्म स्थगित भनेपनि लामो समय सर्ने निश्चित प्राय छ । कोरोना संक्रमणका कारण विश्वकै सर्वाधिक बढी मृत्यु भएको इटालीमा हाल ठाउँठाउँमा कर्फ्यु समेत लगाइएको छ ।