एजेन्सी – स्विडिस भेट्रान फरवार्ड ज्लाटन इभ्राहिमोभिचले इटालियन सिरी ‘ए’ क्लब एसी मिलान छाड्ने घोषणा गरेका छन् । यसै विन्टर सिजनमा फ्रि ट्रान्सफरमा ६ महिनाका लागि मिलान आइपुगेका ज्लाटनले अझै तीन महिना बाँकी छँदै क्लब छाड्ने घोषणा गरेका हुन् ।

यसै साता क्लबले चिफ फुटबल अफिसर जोभोनिर बोवानलाई बर्खास्त गरेसँगै ज्लाटनले पनि क्लब छाड्ने निर्णय गरेको बुझिएको छ । बोवानकै पहलमा ज्लाटन पुनः एसी मिलानमा अनुबन्धित भएका थिए । ज्लाटनले यसअघि २०१० देखि २०१२ मा एसी मिलानमा बिताएका थिए ।

क्लबमा आएको तीन महिनामै उच्च प्रदर्शन गरिरहेका कारण क्लबले उनको सम्झौता नवीकरण गर्ने बुझिएको थियो । तर, बोवानको बर्खास्तीसँगै इभ्राहिमोभिचले पनि क्लब छाड्ने निर्णय गरेपछि मिलानका सिइओ इभान गाजिडिसलाई केही असहज महसुस हुनेछ ।

३८ वर्षीय भेट्रान फरवार्ड ज्लाटनले यो सिजन १० खेलमा ४ गोल गरिसकेका छन् । उनी यसै सिजन अमेरिकी क्लब एलए ग्यालेक्सीबाट मिलान पुगेका थिए ।

ज्लाटनले मिलान छाड्ने घोषणा गरेसँगै उनी अर्काे इटालियन क्लब नेपोली जान सक्ने बुझिएको छ । यसअघि मिलानमा सँगै खेलेका र हालका नेपोलीका सहायक प्रशिक्षक जेनारो गाटुसोले उनलाई क्लबमा ल्याउन चाहेको बुझिएको छ । ज्लाटनले नेपोलीमा व्यवस्थापनमै रहेर समेत नयाँ यात्रा सुरुवात गर्ने सम्भावना रहेको छ ।