एजेन्सी – यूईएफए च्याम्पियन्स लिगको प्रि–क्वाटरफाइनलको दोस्रो लेगमा आज राति दुई खेल हुँदैछ । फ्रेन्च क्लब पीएसजीले घरेलु मैदानमा जर्मन क्लब बोरुसिया डर्टमन्डको आतिथ्यता गर्दा अर्काे खेलमा साविक विजेता इंग्लिस क्लब लिभरपुलले स्पेनिस क्लब एट्लेटिको मड्रिडको सामना गर्दैछ । दुवै खेल नेपाली समय अनुसार राति १ः४५ बजे हुनेछ ।

घरेलु मैदान पार्क डि प्रिन्सेस रंगशालामा डर्टमण्डविरुद्ध उत्रदा पीएसजी दबाबमा हुनेछ । पहिलो लेगमा २–१ ले पछि परेको पीएसजीलाई जितको विकल्प छैन । कम्तीमा पनि पीएसजीलाई १–० को जित आवश्यक छ । १–० को जित निकालेको अवस्थामा पीएसजी अवे गोलमा अघि बढ्न सक्नेछ । बराबरी या हारले पीएसजीको यात्रा प्रि–क्वाटरफाइनलबाटै सकिनेछ ।

पीएसजीलाई घरेलु मैदानमा जितको विकल्प छैन । घरेलु मैदानमा समर्थकबिना खेल्नु पर्दा पीएसजीलाई थप समस्या हुन सक्नेछ । पीएसजीका लागि केलियन एमबाप्पे र ब्राजिली नेयमार नै टोलीको लागि मुख्य हतियार बन्नेछन् । उनीहरुलाई एडिन्सन काभानी, एन्जल डि मारिया, मार्कुन्योस र थियागो सिल्भाले साथ दिनेछ । केलर नाभासले पीएसजीको पोस्ट सम्हाल्नेछन् ।

(कोभिड–१९)कोरोना भाइरसको त्रासका कारण विश्वभरका खेलकुद गतिविधि ठप्प हुदा केही खेलहरु भने बन्द रंगशालामा भइरहेको छ ।
यता, जर्मन टोली डर्टमण्ड पीएसजीलाई घरेलु मैदानमा पराजित गर्दै क्वाटरफाइनल पुग्ने दाउमा हुनेछ । डर्टमन्डका लागि अघिल्लो चरण पुग्न बराबरी नै पर्याप्त रहनेछ ।

युवा फरवार्ड अर्लिङ ब्राउट हालाण्ड र जाडोन सान्चोको उत्कृष्ट लय डर्टमण्डको जितको आधार बन्न सक्नेछ । हालान्डले यो सिजन च्याम्पियन्स लिगमा १० गोल गरिसकेका छन् । हालान्ड नै पीएसजीविरुद्ध मुख्य हतियार हुनेछन् ।