एजेन्सी – गोलरक्षक ह्युगो लोरिसले बिर्सनलायक प्रदर्शन गरेपछि साविकको उपविजेता इंग्लिस क्लब टोटेनहम हस्टपर युइएफए च्याम्पियन्स लिगको प्रि–क्वाटरफाइनलबाटै बाहिरिएको छ । आरबी लाइप्जिग पहिलो पटक च्याम्पियन्स लिगको क्वाटरफाइनलमा प्रवेश गरेको हो ।

मंगलबार राति जित्नै पर्ने खेलमा जर्मन प्रतिद्धन्द्धी आरबी लाइप्जिगसाग ३–० ले पराजित भएपछि टोटेनहमको यात्रा प्रि–क्वाटरफाइनलबाटै सकिएको हो । टोटेनहम समग्रमा जर्मन प्रतिद्धन्द्धीसँग ४–० ले पराजित भएको हो । पहिलो लेगमा टोटेनहम घरेलु मैदानमा १–० ले पछि परेको थियो ।

रेडबुल एरिना लाइप्जिगमा घरेलु टोलीको जितमा मार्सेल सवित्जरले दुई तथा इमिल फोर्सवर्गले एक गोल गरे । खेलको १०औं मिनेटमा मार्सेल सवित्जरले गोल गर्दै घरेलु टोलीलाई अग्रता दिलाए । पेनाल्टी बक्स बाहिरको सवित्जरको प्रहार टोटेनहमका गोलरक्षक लोरिसको हातमा लाग्दै गोलमा परिणत भएको थियो ।

२१औं मिनेटमा सवित्जरले नै हेड गोल गर्दै घरेलु टोलीको अग्रता दोब्बर पारे । सवित्जरको हेडरलाई लोरिसले ठम्याएपनि बचाउन सकेन । ४२औं मिनेटमा टोटेनहमले पहिलो मुभ बनाएपनि गोल गर्न सकेन । लो सेल्सोको प्रहार घरेलु टोलीका गोलरक्षक पिटर गुलासीले बचाए ।

७४औं मिनेटमा डेल अलीको प्रहारमा पुनः गुलासी बाधक बन्दा टोटेनहमले अग्रता घटाउने अवसर गुमायो ।  ८७औं मिनेटमा इमिल फोर्सवर्गले गोल गरेपछि टोटेनहमको अघिल्लो चरण पुग्ने यात्रामा पुर्ण विराम लाग्यो ।