एजेन्सी – इंग्लिस प्रिमियर लिगमा लन्डन क्लब चेल्सीले सानदार जित निकालेको छ । घरेलु मैदानमा चेल्सीले एभर्टनमाथि ४–० को सानदार जित हात पारेको हो । 

चेल्सीको प्रभावशली जितमा मासन माउन्ट पेड्रो रोड्रिग्वेज, विलियन र ओलिभर जिरुउडले गोल गरे । चेल्सीले पहिलो हाफमा २ तथा दोस्रो हाफमा पनि समान दुई गोल गर्न सफल भएको थियो ।

जितसँगै चेल्सीले प्रिमियर लिगमा शीर्ष चारमा रहेर अर्काे सिजनको लागि च्याम्पियन्स लिगमा स्थानको लागि बलियो पकड बनाएको छ । चेल्सीको २९ खेलबाट ४८ अंक पुगेको छ । जुन पाँचौ स्थानको वल्भ्सको भन्दा ५ अंक बढी हो । पराजित एभर्टन ३७ अंक जोडेर १२औं स्थानमा यथावत छ ।

घरेलु मैदानमा चेल्सीले पाहुना टोलीलाई सुरुवाटै दवावमा राख्न सफल हुदा १४औं मिनेटमा अग्रता लिन सफल भएको थियो । पेड्रो रोड्रिग्वेजको पासमा मासन माउन्टले सुन्दर फिनिस गरेका थिए । यो गोलको लागि चेल्सीले २० पास खेल्दै मुभ बनाएको थियो । १८औं मिनेटमा विलियनको प्रहार बाहिरिदा चेल्सी अग्रता दोब्बर पार्नबाट चुक्यो ।

२१औं मिनेटमा चेल्सीले अग्रता दोब्बर पार्न सफल भयो । रोस बार्कलीको पासमा पेड्रो रोड्रिग्वेजले गोल गर्न सफल भएका थिए ।  २५औं मिनेटमा एभर्टनले अग्रता घटाउने सुन्दर अवसर खेर फालेको थियो । कोर्ट जुमाले रिचार्लीसनलाई मिस पास दिएपछि कल्भर्ट लेविनले गरेको प्रहार आकासिएको थियो ।

५१औं मिनेटमा विलियनले गोल गर्दै अग्रता तेब्बर बनायो । उनले रोस बार्कलीको पासमा गोल गर्न सफल भएका थिए । त्यसको तीन मिनेटपछि विलियनको पासमा ओलिभर जिरुउडले गोल गर्दै चेल्सीलाई सानदार जित दिलाए ।