एजेन्सी – गोलको वर्षा भएको खेलमा डुभान जापाटाले ह्याट्रिक पुरा गरेपछि इटालियन सिरी ‘ए’ मा एटलान्टाले सानदार जित निकालेको छ । एटलान्टाले ९ गोल भएको खेलमा घरेलु टोली लिसमाथि ७–२ को फराकिलो जित निकालेको हो ।

लिसमा एटलान्टाको फराकिलो जितमा जापाटाको ह्याट्रिकसँगै जोसिप लिलसिस, लुइस मुरेल र रुस्लान मालिनोभ्स्कीले गोल गरे । एक गोल उपहार पाएको थियो । घरेलु टोलीका रिकार्डाे सापोनोरा र जिउलियो डोनाटीले गोल गरे ।

खेलको १७औं मिनेटमा जिउलियो डोनाटीको आत्मघाती गोलबाट एटलान्टाले खेलमा अग्रता बनाएको थियो । २२औं मिनेटमा डुभान जापाटाले गोल गर्दै एटलान्टाको अग्रता दोब्बर पारे । २९औं मिनेटमा रिकार्डाेले गोल गर्दै घरेलु टोलीलाई खेलमा फर्काउने संकेत दिए । ४०औं मिनेटमा जिउलियो डोनाटीले गोल गर्दै खेललाई २–२ गोलको बराबरीमा ल्याए ।

पहिलो हाफमा एटलान्टालाई बराबरीमा रोक्न सफल लिसले दोस्रो हाफमा रोक्न सकेन । ४७औं मिनेटमा जोसिपले गोल गर्दै एटलान्टालाई खेलमा ३–२ को अग्रता दिलाए । ५४औं मिनेटमा डुभान जापाटाले व्यक्तिगत दोस्रो गोल गर्द एटलान्टाले खेलमा ४–२ को अग्रता बनाउन सफल भयो । ६२औं मिनेटमा जापाटाले ह्याट्रिक पुरा गरे ।

८७औं मिनेटमा लुइस मुरेलले गोल गर्दै एटलान्टालाई फराकिलो जिततर्फ अग्रसर गराए । इन्ज्युरी समयको थप गरिएको पहिलो मिनेटमा रस्लानले गोल गर्दै एटलान्टालाई ७–२ को सानदार जित दिलाए । जितसँगै एटलान्टा २५ खेलबाट ४८ अंक जोडेर चौथो स्थानमा यथावत रहेको छ । पराजितर लिस २६ अंक जोडेर १६औं स्थानमा छ ।

सिरी ‘ए’ को अर्काे खेलमा रोमाले काग्लिएरीमाथि ४–३ को जित निकालेको छ । रोमाको जितमा निकोला कालिनिकले दुई तथा जस्टिन क्लुभर्ट र हेनरिक मिखटारियनले गोल गरे । काग्लिएरीका जोओ पेड्रोले दुई तथा गास्टन पेरेरोले गोल गरे । पेड्रोले एक पेनाल्टी चुकाएको थियो ।
जितसँगै रोमा ४५ अंक जोडेर पाँचौ स्थानमा रहँदा काग्लिएरी ३२ अंक जोडेर ११औं स्थानमा रहेको छ ।