काठमाडौं (हाम्रो खेलकुद)– खेल मिलेमतोको अभियोगमा अखिल नेपाल फुटबल संघ (एन्फा) ले सरस्वती क्लबका कप्तान दीपेश श्रेष्ठलाई २ वर्षको प्रतिबन्ध लगाउनुको साथै ५० हजार रुपैयाँ जरिवाना तोकेको छ ।

एन्फाले खेल मिलेमतोको अभियोगनमा कुनै पनि खेलाडीलाई कारवाही गरेको यो पहिलो पटक हो । एन्फाले बुधबार प्रेस विज्ञप्ती जारी गर्दै प्रतियोगिता नियमावली विपरित कार्य गरेकोले अनुशासन समितिको बैठकले कारवाही गरेको उल्लेख गरेको छ । लिगको ५९ औं खेल यति हिमालयन शेर्पा क्लबविरुद्धको खेलका लागि दीपेशले खेल मिलेतोको प्रस्ताव गरेको आशंकामा एन्फाले दीपेशलाई अन्तिम ३ खेल खेल्नबाट प्रतिबन्ध लगाएको थियो ।

सोही घटनामा एन्फाले हिमालयन शेर्पाका व्यवस्थापक विजेन्द्र पुडासैनीलाई ३ महिनाको प्रतिबन्ध लगाउनुका साथै ३० हजार रुपैयाँ जरिवाना तोकेको छ । त्यस्तो शेर्पाकै गोलकिपर प्रशिक्षक मिन बस्नेतलाई एक पटकलाई सुध्रने मौका दिइ कडा चेतवानी दिइएको एन्फाले विज्ञप्तीमा उल्लेख छ ।

दीपेश हाल एन्फाको स्वीकृति प्राप्त चौथो नेपाल आइस सुदूरपश्चिम खप्तड गोल्डकपमा आयोजक सुदूरपश्चिमबाट खेलिरहेका छन् । उनले आजको मितिबाट २ वर्षसम्म एन्फाको आयोजना र स्वीकृतिमा हुने प्रतियोगितामा खेल्ने छैनन् ।