एजेन्सी – मर्सिसाइड क्लब लिभरपुलले इंग्लिस प्रिमियर लिगमा अपराजित यात्रालाई निरन्तरता दिदा वेस्टह्याममाथि संघर्षपुर्ण जित निकालेको छ । घरेलु मैदानमा लिभरपुलले वेस्टह्याममाथि ३–२ को संघर्षपुर्ण जित निकाल्दै प्रिमियर लिगमा अपराजित यात्रालाई यथावत राख्न सफल भएको हो ।

जितसँगै अपराजित रहेको लिभरपुलले उपाधि जित्ने सम्भावनालाई थप मजवुत बनाएको छ । लिभरपुलले २७ मध्ये २६ खेलमा जित निकाल्दा १ बराबरीको नतिजा निकालेको छ । लिभरपुलको २७ खेलबाट ७९ अंक जोडेको छ । जुन दोस्रो स्थानको म्यानचेस्टर सिटीको भन्दा २२ अंक बढी हो । सिटीको २७ खेलबाट ५७ अंक छ । पराजित वेस्टह्यामको २४ अंक जोडेर रेलिगेसन जोनको १८औं स्थनमा छ ।

एनफिल्डमा सोमबार राति भएको खेलमा लिभरपुलको जितमा जर्जिन्हो विज्नाल्डम, मोहम्मद सलाह र साडियो मानेले गोल गरे । वेस्टह्यामका इसा डियोप र पाब्लो फोर्नाल्सले गोल गरे ।  खेलको नवौं मिनेटमा जर्जिन्हो विज्नाल्डमले ट्रेन्ट एलेक्सजेन्डर अर्नाेल्डको पासमा गोल गर्न सफल भएका थिए । तर, लिभरपुलको त्यो अग्रता लामो समय टिकेन १२औं मिनेटमा इसा डियोपले रोवर्ट स्नोडग्रासको पासमा गोल गर्दै खेललाई १–१ गोलको बराबरीमा ल्याए ।

५४औं मिनेटमा पाब्लो फोर्नाल्सले गोल गरेपछि लिभरपुल खेलमा २–१ ले पछि परेको थियो । उनले डिक्लान राइसको पासमा गोल गर्न सफल भएका थिए । ६८औं मिनेटमा एन्ड्रिउ रोबर्टसनको पासमा मोहम्मद सलाहले गोल गर्दै खेललाई २–२ गोलको बराबरीमा ल्याए । त्यसपछि साडियो मानेले ८१औं मिनेटमा गोल गर्दै लिभरपुललाई ३–२ को अग्रता दिलाए । ८६औं मिनेटमा साडियो मानेल गोल गरेपनि अफसाइड ठहरिए । त्यसपछि थप गोल निस्कन नसक्दा लिभरपुल ३–२ ले विजयी हुन सफल भयो ।