एजेन्सी – स्टार फरवार्ड नेयमारले रातो कार्ड पाएको खेलमा पेरिस सेन्ट जर्मेन (पीएसजी) ले साँघुरो जित निकालेको छ । लिग वान अन्तरगत आइतबार राति भएको खेलमा घरेलु टोली पीएसजीले बोर्डोमाथि ४–३ को संघर्षपुर्ण जित निकालेको हो । 

घरेलु टोलीको जितमा मार्कुन्योसले दुई तथा एडिन्सन काभानी र केलियन एमबाप्पेले गोल गरे । बोर्डोका उइ जो ह्वाङ, पाब्लो र रुवेन पार्डाेले गोल गरे । ७ गोलको थ्रिलरमा पीएसजीको खेलको १८औं मिनेटमा उइ जो ह्वाङको गोलबाट पछि परेको थियो । उनले टोमा बासिकको पासमा गोल गर्न सफल भएका थिए । तर, बोर्डोको त्यो अग्रता लामो समय टिकेन । २५औं मिनेटमा एन्जल डि मारियाको पासमा एडिन्सन काभानीले बराबरी गोल फर्काए ।

पहिलो हाफको इन्ज्युरी समयको थप गरिएको दोस्रो मिनेटमा मार्कुन्योसले एन्जल डि मारियाको पासमा गोल गर्दै पीएसजीलाई खेलमा २–१ को अग्रता दिलाए । पीएसजीको त्यो अग्रता पनि धेरै बेर टिकेनमा इन्ज्युरी समयको थप गरिएको छैटौं मिनेटमा पाब्लोले बराबरी गोल फर्काउँदा पहिलो हाफ २–२ गोलको बराबरीमा सकिएको थियो ।

दोस्रो हाफमा ७ मिनेटको अन्तरमा पीएसजीले दुई गोल गरेपछि पीएसजीले खेलमा ४–२ को अग्रता लिन सफल भयो । ६३औं मिनेटमा मार्कुन्योलसले गोल गर्दै पीएसजीले खेलमा ३–२ को अग्रता दिलाए । ६९औं मिनेटमा एमबाप्पेले काभानीको पासमा गोल गरेपछि पीएजसीले खेलमा ४–२ को अग्रता लिन सफल भयो ।

८३औं मिनेटमा रुवेन पाब्लोले गोल गर्दै बोर्डोलाई खेलमा फर्काउन संकेत दिए । ८९औं मिनेटमा माउरो इकार्डीले गोल गरेपनि भिएआरमा उनी अफसाइड ठहरिए । इन्ज्युरी समयको थप गरिएको दोस्रो मिनेटमा नेयमार दोहोरो पहेँलो कार्ड खादै मैदानबाट बाहिरिएपछि पीएसजी १० खेलाडीमा सीमित बन्यो । तर, बोर्डोले त्यसको फाइदा उठाउन सकेन र पीएसजी ४–३ ले विजयी हुन सफल भयो ।

जितसँगै पीएसजीले लिग वानमा १३ अंकको स्पष्ट अग्रता लिदै उपाधि जित्न सम्भावना बलियो बनाएको छ । पीएसजीके २६ खेलबाट ६५ अंक पुगेको छ । उति नै खेलबाट मार्सेलीको ५२ अंक छ । पराजित बोर्डो ३५ अंकसहित १२औं स्थानमा छ ।

अन्य नतिजा

एन्जर्सविरुद्ध मोन्टेपेलिर (१–०)

डिजोनविरुद्ध मोनाको (१–१)

लिलविरुद्ध टोलुज (३–०)

स्टार्सवर्गविरुद्ध एमिएन्स (०–०)

सेन्ट इटिएनविरुद्ध रेइम्स (१–१)

रेनिसविरुद्ध निम्स (२–१)