एजेन्सी – नर्वे तथा जर्मन क्लब बोरुसिया डर्टमन्डका युवा सनसनी अर्लिङ ब्राउट हालान्डको उच्च प्रदर्शनलाई निरन्तरता दिदा बोरुसिया डर्टमन्डले जर्मन बुन्डेस लिगामा जित निकालेको छ । डर्टमन्डले वेर्डर ब्रेमेनलाई उसकै मैदानमा २–० ले पराजित गरेको हो ।

डर्टमन्डको जितमा हालान्डसँगै डान एक्सेल जागाडोउले गोल गरे । दुवै गोल दोस्रो हाफमा सम्भव भएको थियो । घरेलु टोलीलाई दवावमा राखेपनि डर्टमन्डले गोलको लागि दोस्रो हाफ कुर्नुपरेको थियो ।

५२औं मिनेटमा डान एक्सेल जागाडोउले गोल गर्दै डर्टमन्डलाई अग्रता दिलाए । उनले जाडोन सान्चोको पासमा गोल गर्न सफल भएका थिए । ६६औं मिनेटमा अचराफ हाकिमीको पासमा हालान्डले गोल गर्दै डर्टमन्डको अग्रता दोब्बर बनायो ।

यसै विन्टरमा आरबी साल्जवर्गबाट डर्टमन्ड आएका हालान्डले आफ्नो उच्च प्रदर्शनलाई निरन्तरता दिदै जर्मनीमा आफ्नो छाप छोड्न सफल भएका छन् । उनले बुन्डेस लिगाको ६ खेलमा ९ गोल गरिसकेका छन् । १९ वर्षे हालान्डले समग्रमा डर्टमन्डबाट ८ खेल खेल्दै १२ गोल गरिसकेका छन् ।

जितसँगै डर्टमन्डले शीर्षस्थानको बायर्न म्युनिख र आरबी लाइप्जिगमाथि दवाव यथावतै राखेको छ । डर्टमन्डको २३ खेलबाट ४५ अंक छ । समान खेलबाटै बायर्नको ४९ तथा लाइप्जिगको ४८ अंक छ । वेर्डर ब्रेमेन १७ अंक जोडेर १७औं स्थानमा छ ।

शनिबार राति नै भएको अर्काे खेलमा आरबी लाइप्जिगले साल्केमाथि ५–० को सानदार जित निकाल्दै शीर्षस्थानको बायर्नसँगको अंक दुरी १ मा झारेको छ । लाइप्जिगको जितमा मार्सेल सावित्जर, टिमो वेर्नर, मार्सेल हल्सटनेवर्ग, एंगेलिनो र इमिल फोर्सवर्गले गोल गरे । पहिलो हाफमा १ तथा दोस्रो हाफमा ४ गोल सम्भव भएको थियो ।

२३ खेलबाट लाइप्जिगको ४८ अंक छ । समान खेलबाटै बायर्नको ४९ अंक छ । पराजित साल्के ३६ अंक जोडेर छैटौं स्थानमा छ ।