एजेन्सी – सब्सिच्युट खेलाडीको रुपमा मैदान प्रवेश गरेका ब्राजिली ग्याब्रिएल जेससको एकमात्र गोलमा म्यानचेस्टर सिटीले इंग्लिस प्रिमियर लिगमा झिनो जित निकालेको छ । सिटीले घरेलु टोली लेस्टरमाथि १–० को झिनो जित निकालेको हो ।

किङ पावर स्टेडियममा शनिबार राति भएको खेलमा घरेलु टोलीलाई दवावमा राखेपनि गोलको लागि दोस्रो हाफ नै कुर्नुपरेको थियो । ६०औं मिनेटमा सिटीले पेनाल्टीको मौका पाएपनि सदुपयोग गर्न नसक्दा सिटी अग्रता लिनबाट चुक्यो ।

इकेए गुन्डोगानको कर्नरमा डेनिस पाएटले जानजान ह्यान्ड गरेपछि भिएआरको सहायतामा सिटीले पेनाल्टी पाएको थियो । तर सर्जियो अगुइरोको पेनाल्टी लेस्टरका गोलरक्षक कास्पर स्माइकलले रोकिदिए ।

८०औं मिनेटमा सब्सिच्युट जेससले गोल गर्दै सिटीलाई अग्रता दिलाए । उनले रियाल महारेजको पासमा गोल गर्न सफल भएका थिए । जेससले मैदान छिरेको ४ मिनेट भित्र नै गोल गर्न सफल भएका थिए । उनी ७७औं मिनेटमा सर्जियो अगुइरोको स्थानमा मैदानमा प्रवेश गरेका थिए । त्यसपछि थप गोल निस्कन नसक्दा जेससको गोल नै सिटीको जितमा निर्णायक बन्यो ।

जितसँगै सिटीले शीर्षस्थानको लिभरपुलसँगका अंक दुरी छोट्याउदा तेस्रो स्थानको लेस्टर सिटीसँगको अक दुरी बढाएको छ । २७ खेलबाट ५७ अंक जोडेको सिटी एक खेल कम खेलेको लिभरपुलसँग १९ अंकले पछि छ । तेस्रो स्थानको लेस्टरलाई ७ अंकले पछि पारेको छ । लेस्टरको ५० अंक छ ।

अन्य नतिजा

चेल्सीविरुद्ध टोटेनहम (२–१)

बर्नलीविरुद्ध बर्नमाउथ (३–०)

क्रिस्टल प्यालेसविरुद्ध न्युक्यासल (१–०)

सेफिल्डविरुद्ध ब्राइटन (१–१)

साउथह्याम्पटनविरुद्ध एस्टन भिल्ला (२–०)