एजेन्सी – पोल्यान्डका फरवार्ड रोवर्ट लेवान्डोस्कीको दुई गोल मद्दतमा बायर्न म्युनिखले जर्मन बुन्डेस लिगामा संघर्षपुर्ण जित निकालेको छ । बायर्नले रेलिगेसन जोनमा रहेको पाडेरवर्नमाथि ३–२ को संघर्षपुर्ण जित निकालेको हो । 

बायर्नको जितमा रोवर्ट लेवान्डोस्कीले दुई तथा सर्जी जिनाब्रीले एक गोल गरे । पाडेरवर्नका डेनिस सवैनी र एस्भेन मिचेलले गोल गरे । खेलभर नै पाहुना टोलीलाई दवावमा राख्दै बायर्नले गोल गरेपनि आफ्नो रक्षापंक्ति बलियो बनाउन नसक्दा जितको लागि निकै संघर्ष गर्नुपरेको थियो ।

एलियन्ज एरिनामा शुक्रबार राति भएको खेलको २५औं मिनेटमा सर्जी जिनाब्रीले गोल गर्दै बायर्नलाई अग्रता दिलाएका थिए । उनले कोरेन्टिन टोलिसोको पासमा गोल गरेका थिए । ४४औं मिनेटमा डेनिसले गोल गरेपछि पहिलो हाफ १–१ गोलको बराबरीमा टुंगिएको थियो ।

७०औं मिनेटमा सर्जी जिनाब्रीको पासमा रोवर्ट लेवान्डोस्कीले गोल गर्दै बायर्नलाई खेलमा पुनः २–१ को अग्रता दिलाएका थिए । त्यसको ५ मिनेटपछि नै पाडेरवर्नले बराबरी गोल फर्काउन सफल भयो । पाडेरवर्नका मिचेलले बराबरी गोल गोल फर्काए । बराबरीतर्फ धकेलिन लागेको खेल सकिन दुई मिनेट बाँकी रहँदा लेवान्डोस्कीले व्यक्तिगत दोस्रो तथा टोलीका लागि तेस्रो गोल गर्दै बायर्नलाई ३–२ को संघर्षपुर्ण जितसँगै महत्वपुर्ण ३ अंक दिलाए ।

जितसँगै बायर्नले शीर्ष स्थानमा ४ अंकको अग्रता बनाएको छ । बायर्नको २३ खेलबाट ४९ अंक रहँदा एक खेल कम खेलेको आरबी लाइप्जिगको ४५ अंक छ । पराजित पाडेरवर्न १६ अंक जोडेर रेलिगेसन जोनको पुछारमा छ ।