एजेन्सी – युभेन्टसका स्टार फरवार्ड क्रिस्टियानो रोनाल्डोले फ्रान्सेली फरवार्ड किलियन एमबाप्पे नै फुटबलको वर्तमान र भविष्य रहेको बताएका छन् ।

सन् २०१६-१७ मा फ्रान्सेली लिगमा मोनाकोबाट खेल्दै विश्व फुटबलमा प्रवेश गरेका एमबाप्पेले छोटो समयमा नै अपार सफलता हासिल गरेका छन् । उनले फ्रान्सबाट खेल्दै फिफा विश्वकप तथा पीएसजी र मोनाकोका लागि ३ लिग उपाधिसँगै ३ घरेलु कप पनि उचालेका छन् । २१ वर्षको उमेरमा चर्चाको शिखर चुमेका एमबाप्पेलाई युरोपका ठूला टोलीले पछ्याइरहेका छन् ।

लोकप्रिय स्पेनिस संचारमाध्यम मार्सासँग अन्तर्वार्तामा बोल्दै रोनाल्डोले भनेका छन्, ‘एमबाप्पे विश्व फुटबलका वर्तमान र भविष्य हुन् । उनी उत्कृष्ट खेलाडी हुन् । उनको द्रुत गतिले पनि उनलाई अझ माथि लग्ने विश्वस्त छु ।’

पछिल्लो एक दशक रोनाल्डो र मेस्सीले दवदवा कायम गरेको विश्व फुटबलमा एमबाप्पेको उदयलाई धेरैले उनीहरुको उत्तराधिकारीको रुपमा जोडेर हेरेका छन् । एम्बाप्पेले गत सिजन सबै खेलमा गरेर ३९ गोल गरेका थिए । यस सिजन उनले २४ गोल गरिसकेका छन् जसमा लिगमा १५ गोल सामेल छ ।

यता रोनाल्डोले पनि जारि सिजन सुस्त सुरुवात गरेपनि पछिल्लो समय आफ्नो लय समाएका छन् । उनले सिजनभर २४ गोल गरेका छन् । जसमध्य पछिल्लो ८ खेलमा मात्र १२ गोल सम्भव भएको छ । उनकै प्रदर्शनमा युभेन्ट्स अंक तालिकाको शीर्ष स्थानमा छ ।