काठमाडौं (हाम्रो खेलकुद)– इन्डोनेसियामा व्यवसायिक फुटबल खेलिरहेका राष्ट्रिय फुटबल टोलीका स्टार मिडफिल्डर रोहित चन्दले कतार एयरवेज सहिद स्मारक ए डिभिजन लिगको नयाँ च्याम्पियन सानमिगेल मछिन्द्र क्लबलाई बधाई दिएका छन् । उनले लिग च्याम्पियन मछिन्द्र तथा लिगका विधागत उत्कृष्ट खेलाडीलाई फेसबुक पेजमार्फत बधाई दिएका छन् ।

फाइनल सरह रहेको शनिबारको खेलमा त्रिभुवन आर्मी क्लबलाई १–० ले हराउँदै रोहितको पूर्व क्लब मछिन्द्र लिगको नयाँ च्याम्पियन बनेको थियो । मछिन्द्रले पहिलो पटक लिग जितेको हो । आर्मी भने दोस्रो पटक उपाधिको नजिक पुगेर पनि उपाधि जित्न असफल भएको थियो । यसपटक जस्तै बराबरी गर्दा पुग्ने खेल गुमाउँदा आर्मी उपाधिबाट चुकेको थियो । २०६३ मा बराबरी गरे पुग्ने खेल गुमाउँदा आर्मी च्याम्पियन बन्नबाट चुकेको थियो ।

झन्डै एक दशक देखि विदेशी लिग खेल्दै आएका रोहितले मछिन्द्रबाट ए डिभिजन लिगमा डब्यू गरेका थिए । २०६६/०६७ मा उनी लिगको उत्कृष्ट रक्षक घोषित भएका थिए । अर्को वर्ष तत्कालिन भारतीय .(आई ) लिग टोली एचएएलमा आबद्ध भएका रोहित सन् २०१३ मा इन्डोनेसिया पुगेका थिए ।

२०१५ मा बाहेक उनी लगातार इन्डोनेसियाको लिग टोलीमा आबद्ध छन् । केहि साता अघि मात्र उनले पुनः पर्सिजा जाकार्तासँग दुई वर्षको सम्झौता नविकरण गरेका छन् । २०१८ मा पर्सिजालाई लिग च्याम्पियन बनाउन महत्वपूर्ण भूमिका निर्वाह गरेका रोहित लिगकै सर्वोत्कृष्ट खेलाडी घोषित भएका थिए ।

आजै अखिल नेपाल फुटबल संघ (एन्फा) ले अर्को महिना चाइनिज ताइपे र अष्ट्रेलियाविरुद्ध हुने विश्व कप छनोटका खेलका लागि खेलाडीलाई बन्द प्रशिक्षणमा डाकेका छन् । रोहित, भारतमा लिग खेल्दै आएका राष्ट्रिय टोलीका कप्तान एवंम् गोलकिपर किरण चेम्जोङ र माल्दिभ्समा रहेका अभिषेक रिजाललाई भने क्लबले छाडेपछि राष्ट्रिय टोलीमा आबद्ध हुने जनाएको छ ।

लिगका उत्कृष्ट

फेयर प्ले – रुस्लान थ्री स्टार क्लब नगद १ लाख रुपैयाँ

युवा खेलाडी – दर्शन गुरुङ (एनआरटी) १ लाख रुपैयाँ

गोलरक्षक – दिप कार्की (मनाङ) १ लाख ५० रुपैयाँ

डिफेन्डर – अनन्त तामाङ (थ्री स्टार) १ लाख ५० रुपैयाँ

मिडफिल्डर- विशाल राई ‘बी’ (मछिन्द्र) १ लाख ५० रुपैयाँ

फरवार्ड – भरत खवास (आर्मी) १ लाख ५० रुपैयाँ

प्रशिक्षक – प्रवेश कटुवाल (मछिन्द्र) १ लाख ५० रुपैयाँ