एजेन्सी – वल्भ्स र लेस्टर सिटीले इंग्लिस प्रिमियर लिगमा गोलरहित बराबरी खेल्दै अंक बाँडेका छन् । घरेलु टोली वल्भ्स १० खेलाडीमा समेटिएको लेस्टरसिटीसँग रोकिएको हो ।

बराबरीसँगै लेस्टरले दोस्रो स्थानमा उक्लने मौका गुमउदा वल्भ्सले पनि छैटौं स्थानमा उक्लने अवसर खेर फाल्यो । बराबरीपछि लेस्टर २६ खेलबाट ५० अंक जोडेर तेस्रो स्थानमा यथावत रहँदा वल्भ्स ३६ अंक जोडेर सातौ स्थानमा रहेको छ । शीर्षस्थानको लिभरपुलको ७३ तथा दोस्रो स्थानको म्यानचेस्टर सिटीको ५१ अंक छ । दुवैले एक खेल कम खेलेका छन् ।

प्रतिस्पर्धात्मक खेलको शुरुवातमा घरेलु टोलीलाई बल पोजेसनमा दवावमा राखेपनि वल्भ्सले पहिलो पोस्ट आक्रमण बुनेको थियो । १०औं मिनेटमा पेड्रो नेटोले दुई डिफेन्डरलाई बिट गर्दै डिएगो जोटालाई दिएको पासमा उनको प्रहार लेस्टरका गोलरक्षकले बचाए ।

४२औं मिनेटमा जोटाको अर्काे प्रहार बाहिरियो । ४४औं मिनेटमा वल्भ्सका विली वोलीकोले गोल गरेपनि भिएआरबाट मान्यता नपाउदा घरेलु टोली अग्रता लिनबाट चुक्यो । गोलका लागि बल उपलब्ध गराउने जोटा अफसाइड ठहरिए ।

६०औं मिनेटमा लेस्टरले पेनाल्टी अपिल गरेपनि रेफ्रीले त्यसलाई कुनै मतलवै राखेनन् । ७६औं मिनेटमा लेस्टर १० खेलाडीमा समेटियो । लेस्टरका हम्जा चौधरीले अनावश्यक ह्यान्ड गरेपछि रेफ्रीले दोहोरो पहेँलो कार्ड देखाउदै उनलाई मैदान बाहिर पठाए । तर, लेस्टर १० खेलाडीमा समेटिएको फाइदा घरेलु टोली वल्भ्सले उठाउन सकेन ।  त्यसपछि पनि थप गोल निस्कन नसक्दा दुवै टोलीले गोलरहित बराबरी खेल्दै अंक बाँड्न बाध्य बने ।