एजेन्सी – युवा खेलाडीद्वय एर्लिङ हालान्ड र जेडन सान्चोले गोल गरेसँगै बोरुसिया डर्टमन्डले जर्मन बुन्डेस लिगामा सानदार जित निकालेको छ । घरेलु टोली डर्टमन्डले फ्रान्कफर्टमाथि ४–० को सानदार जित निकालेको हो । 

डर्टमन्डको फराकिलो जितमा हालान्ड र सान्चोसँगै लुकास्ज पिसजेक र राफायल गुरेरियोल गोल गरे । सिग्नल इडुना पार्कमा शुक्रबार राति भएको खेलको पहिलो हाफमा १ तथा दोस्रो हाफमा ३ गोल सम्भव भएको थियो । खेलको ३३औं मिनेटमा अचराफ हाकिमीको पासमा लुकास्ज पिसजेकले गोल गर्दै घरेलु टोलीलाई पहिलो हाफमा १–० ले अघि बढाएका थिए ।

४९औं मिनेटमा एक्सले विस्टेलको पासमा जाडोन सान्चोले गोल गरेपछि डर्टमन्डले खेलमा २–० को अग्रता बनायो । ५४औं मिनेटमा आर्लिङ हालान्डले आचरफ हाकिमीको पासमा गोल गर्दै डर्टमन्डलाई फराकिलो जिततर्फ अग्रसर गराए ।

यसै विन्टरमा साल्जवर्गबाट डर्टमन्ड पुगेका हालान्डले बुन्डेस लिगामा ५ खेलमा ८ गोल गर्दै आफ्नो प्रभावशमली प्रदर्शनलाई जारी राखेका छन् । ७४औं मिनेटमा गुरेरियोल गोल गर्दै डर्टमन्डलाई ४–० को सानदार जित दिलाए ।

जितसँगै डर्टमन्ड २२ खेलबाट ४२ अंक जोडेर दोस्रो स्थानमा उक्लिएको छ । एक खेल कम खेलेको आरबी लेइपजिगको समान ४२ अंक रहेपनि गोल अन्तरमा तेस्रो स्थानका रहेको छ । शीर्षस्थानको बायर्नको ४३ अंक छ । फ्रान्कफर्ट २८ अंक जोडेर नवौं स्थानमा छ ।