काठमाडौं (हाम्रो खेलकुद)– नेपाल आयल नेपाल मनाङ मर्स्याङ्दी क्लबले कम्तिमा तेस्रो स्थानमा रहँदै कतार एयरवेज सहिद स्मारक ए डिभिजन लिगको अन्त्य गर्ने भएको छ ।

प्रभु बैंक जावलाखेल युथ क्लबलाई शुक्रबार १-० ले पराजित गर्दै साविक विजेता मनाङले रुस्लान थ्री स्टार क्लबलाई पछि पार्दै कम्तिमा शीर्ष तीन स्थान हासिल गर्ने भएको हो ।

१२अौं मिनेटमा दयानन्द सिंहको प्रहार गोलरक्षक टेकेन्द्र थापाले पोजिसन बाहिर रहेपनि नियन्त्रणमा लिन सफल भए । २७अौं मिनेटमा ड्याडी जुनियर वाम्वाको प्रहारलाई मनाङका गोलरक्षक दिप कार्कीले नियन्त्रणमा लिन नसकेको बललाई विशाल तामाङले प्रहार गरेपनि नियन्त्रणमा लिन सफल भए ।

७५अौं मिनेटमा निशान लिम्बुले गोल गर्दै मनाङलाई अग्रता दिलाए । सुशील लामाको क्रस पासमा निशानले हेडमार्फत गोल गर्न सफल भएका थिए । त्यसअघि जावलाखेलका सुजित बुढाथोकीको प्रहार बारमा लागेर फर्किएको थियो ।

थ्री स्टार आजै च्यासल युथ क्लबलाई २–० ले हराएर केहि समयका लागि तेस्रो स्थानमा उक्लेको थियो । यस नतिजा सँगै १३ खेलमा मनाङले ८ जित , ४ बराबर र १ हारका साथ २८ अंक जोड्यो । समान खेलमा ८ जित , २ बराबर र ३ हार बेहोरेको थ्री स्टारले २६ अंक जोडेको थियो ।

जावलाखेलले पनि शीर्ष ६ मा रहँदै लिगको अन्त्य गरेको छ । जावलाखेल १९ अंकमा रहँदा नेपाल पुलिस क्लब २० अंकसहित पाँचौ स्थानमा रह्यो । लिगको उपाधिका लागि शनिबार हालका शीर्ष दुई क्लब त्रिभुवन आर्मी क्लब र मछिन्द्र क्लब भिड्ने छन् ।