एजेन्सी – क्याटलान क्लब बार्सिलोना तथा फ्रेन्च फरवार्ड औसमाने डेम्वेले ६ महिना मैदान बाहिर रहने पक्का भएको छ । बार्सिलोनाले मंगलबार राति प्रेस विज्ञप्ति जारी गर्दै डेम्वेले ६ महिना मैदान बाहिर रहेने पक्का भएको बताएको छ ।

चोटसँगै डेम्वेलेले यो सिजनको बाँकी खेलका साथै युरोपियन च्याम्पियनसिप २०२० समेत गुमाउने भएको छ । डेम्वेलेले गत नोभेम्वरमा दाया खुट्टामा ह्यामस्ट्रिङ चोट बोक्न पुगेका थिए । उनको मंगलबार नै फिनल्यान्डको टुर्कुमा खुट्टाको सफल शल्यक्रिया भएको थियो ।

बार्सिलोनाका पहिलो रोजाईका डेम्वेलेको डाक्टर लासी लेम्पाइनेनले सफल शल्यक्रिया गरेका थिए । उनी मैदानमा फर्कन कम्तीमा पनि ६ महिना बढी लाग्ने चिकित्सकले बताएका छन् । नोभेम्वर देखि नै ह्यामस्ट्रिङ इन्ज्युरी रहेका उनले लगातार रिकभरी प्रयास गरेपनि उनको शल्यक्रिया नै गर्नुपर्ने भएको हो । उनी एक साता अघि बार्सिलोनाको प्रशिक्षण छाड्दै शल्यक्रियाका लागि फिनल्यान्ड पुगेका थिए ।

१३५ मिलियन पाउन्डमा २०१७–१८ को सिजनमा बार्सिलोना पुगेका डेम्वेले लगातार चोटसँग जुधिरहेका छन् । उनले बार्सिलोनामा तीन सिजन बिताउदा ७४ म्याच खेल्दा १० खेलमा मात्रै पुरा समय मैदानमा बिताउदै १९ गोल र १७ असिस्ट दिएका छन् । डेम्वेलेले २०१७–१८ को सिजनमा २४ खेलमा ४ गोल र ९ असिस्ट दिएका छन् । अर्काे सिजन ४२ खेलमा १४ गोल र ९ असिस्ट तथा यो सिजन ९ खेलमा १ गोल गरेका छन् ।

चोटकै कारण लुइस सुआरेजलाई गुमाएको बार्सिलोनालाई डेम्वेलेको चोटले झने समस्या भएको छ । तर, आफ्ना मुख्य फरवार्डद्धय चोटका कारण मैदानबाट बाहिरिएपनि रोयल स्पेनिस फुटबल फेडेरेसनको नियम अनुसार समर र विन्टर सिजन सकिएपनि इर्मजेन्सी खेलाडी अनुबन्ध गर्न पाउने नियमका कारण स्पेनबाटै एक खेलाडी क्लबमा राख्न पाउने नियम छ । बार्सिलोनाले उक्त नियय प्रयोग गर्न सक्नेछ ।

बार्सिलोनाको अग्रपङ्तिमा अहिले कप्तान लियोनेल मेस्सीसँगै एन्टोयन ग्रिजमन र अन्सु फाती रहेका छन् । बार्सिलोनाले रियाल सोसिडाडका विलियन जोस, गेटाफेका एन्जल रोड्रिग्वेज, डिर्पोटिभो अलाभेसका लुकास पेरेज र रियल बेटिसका लोरेन मोरोनमध्ये एकलाई अनुबन्ध गर्न सक्ने सम्भावना छ ।

स्पेनिस ला लिगामा बार्सिलोना ४९ अंक जोडेर दोस्रो स्थानमा रहेको छ । रियाल म्याड्रिड ५२ अंक जोडेर शीर्षस्थानमा रहेको छ ।