काठमाडौं (हाम्रो खेलकुद)– कतार एयरवेज सहिद स्मारक ए डिभिजन लिगको उपाधिको रोमाञ्चकता अन्तिम खेल सम्म पनि रहने भएको छ । ब्रिगेड ब्वाइज क्लबलाई मंगलबार ३–० ले हराउँदै त्रिभुवन आर्मी क्लब पुनः शीर्षस्थानका उक्लेपछि यसपटकको लिगको छिनोफानो शनिबारको खेलबाट मात्र हुनेछ ।

शनिबार शीर्ष दुई टोली आर्मी र सानमिगेल मछिन्द्र क्लबबीच प्रतिस्पर्धा हुनेछ । त्यहि खेलले लिगको विजेता टुंगो लाग्नेछ । उपाधि जित्नका लागि त्यो खेलमा आर्मीले बराबरी गरे मात्र पनि पुग्ने छ भने मछिन्द्रले जित्नै पर्ने हुन्छ । १२ खेलको समाप्तीमा आर्मीको २९ अंक पुगेको छ भने दोस्रो स्थानमा झरेको मछिन्द्रको २८ अंक छ ।

१२ खेलमा समान ९ जित, २ बराबर र १ हार भएपनि मछिन्द्र १ अंकले पछाडि छ । गत वर्ष लिगमा अंकतालिकाको पुछारबाट दोस्रोमा रहेका कारण मछिन्द्रको यो वर्ष एक अंक घटाइएको थियो । सातदोबाटोस्थित एन्फा कम्प्लेक्समा मंगलबार कप्तान भरत खवासको कीर्तिमानी गोलमा अग्रता लिएको आर्मीका लागि दोस्रो हाफमा विकास तामाङ र टेकबहादुर बुढाथोकीले गोल गरेका थिए ।

पाँचौं मिनेटमा भरतको गोलबाट आर्मीले अग्रता लिएको थियो । जर्ज प्रिन्स कार्कीको क्रसमा भरतले हेडमार्फत गोल गरेका थिए । लिगमा त्यो उनको कीर्तिमानी ५० औं गोल हो । विकासले ५४ औं मिनेटमा गोलअन्तरलाई दोब्बर पारेका थिए । सन्तोष तामाङको पासमा विकासले पेनाल्टी बक्सबाट हेडमार्फत गोल गरेका थिए । टेकले ७० औं मिनेटमा टोलीका लागि तेस्रो गोल गरेका थिए ।

अखिल नेपाल फुटबल संघ (एन्फा) को तेस्रो ब्याचका भरतले यसअघि नेपाल पुलिस क्लबबाट पनि लिग खेलेका थिए । १० वर्ष भन्दा लामो लिग अनुभवमा उनी ५० गोल पुरा गर्ने थोरै खेलाडी मध्ये परेका छन् । लिगमा ५० गोल गर्ने उनी सातौं खेलाडी बनेका छन् । यसअघि बसन्त थापा, रमेश बुढाथोकी, जिवेश पाण्डे, सुरेन्द्र तामाङ, गणेश लावती र सन्तोष साहुखलले ५० गोल पुरा गरेका थिए ।

सन्तोषले भने यहि लिगका दौरान लिगको एक सय गोल पुरा गर्ने पहिलो खेलाडीको कीर्तिमान राखेका थिए । भरतको कप्तानीमा आर्मीले लिगमा उच्च प्रदर्शन गरिरहेको छ । राष्ट्रिय टोलीको समेत कप्तानी गरिरहेका भरतले यो सिजनमा पनि एकरुपको प्रदर्शन गरिरहेका छन् ।
बिबिसी ८ अंकसहित १२ औं स्थानमा छ । एपिएफ पनि समान अंकका साथ १३ औं स्थानमा छ भने ४ अंक जोडेको सरस्वती सोमबार नै बी डिभिजनमा घटुवा भइसकेको छ ।