एजेन्सी – मिलान डर्वीमा जित निकाल्दै इन्टर मिलान इटालियन सिरी ‘ए’ को शीर्षस्थानमा उक्लिएको छ । इन्टर मिलानले दुई गोलले पछि परेको स्थिति उल्ट्याएर ४–२ को पूनरागमन जित निकाल्दै युभेन्टसलाई पछि पार्दै लिगको शीर्षस्थानमा पूनरागमन गरेको हो । 

मिलानोमा आइतबार राति भएको खेलमा इन्टरको जितमा मार्सेलो ब्रोजोभिक, म्याटियस भिन्सिनो, स्टेफन डि भिरिज र रोमेलु लुकाकुले गोल गरे । एसी मिलानका एन्टी रेविक र ज्लाटन इभ्राहिमोभिचले गोल गरे ।

खेलको ४०औं मिनेटमा एन्टी रेविकले ज्लाटन इभ्राहिमोभिचको पासमा गोल गर्दै एसी मिलानलाई अग्रता दिलाए । पहिलो हाफको इन्ज्युरी समयको थप गरिएको पहिलो मिनेटमा ज्लाटन इभ्राहिमोभिचले फ्रान्क केसिइको पासमा गोल गरेपछि एसी मिलानले पहिलो हाफमा २–० को अग्रता बनाएको थियो ।

तर, त्यो अग्रतालाई एसी मिलानले दोस्रो हाफमा जोगाउन सकेन । ५१औं मिनेटमा मार्सेलो ब्रोजोभिकले गोल गर्दै इन्टर मिलानलाई खेलमा फर्काउने संकेत दिए । ५४औं मिनेटमा म्याटियस भिन्सिनोले गोल गर्दै खेललाई २–२ गोलको बराबरीमा ल्याए ।

७०औं मिनेटमा स्टेफनले गोल गर्दै घरेलु टोली इन्टर मिलानलाई खेलमा पहिलोपटक ३–२ को अग्रता दिलाए । इन्ज्युरी समयको थप गरिएको तेस्रो मिनेटमा भिक्टर मोसेसको पासमा रोमेलु लुकाकुले गोल गर्दै इन्टर मिलानलाई ४–२ को पूनरागमन जित दिलाए ।

जितसँगै इन्टर मिलानको २३ खेलबाट ५४ अंक पुगेको छ । समान खेलबाटै ५४ अंक रहेको युभेन्टस गोल अन्तरमा दोस्रो स्थानमा झरेको छ । एसी मिलान ३२ अंक जोडेर १०औं स्थानमा छ ।