एजेन्सी – क्याटलान क्लब बार्सिलोनाले स्पेनिस ला लिगामा संघर्षपुर्ण जित निकालेको छ । बार्सिलोनाले रियल बेटिसमाथि ३–२ को संघर्षपुर्ण जित निकालेको हो ।

बार्सिलोनाको जितमा फ्रान्की डि जोङ, सर्जियो बुस्क्वेट्स र क्लेमेन्ट लेङ्लेटले गोल गरे । घरेलु टोली बेटिसका सर्जियो कानालेस र नविल फेकिरले गोल गरे ।

घरेलु मैदानमा रियलले खेलको छैटौ मिनेटमा सर्जियो कानालेसले पेनाल्टीमा गोल गर्दै अग्रता लिएको थियो । पेनाल्टी बक्समा क्लेमेन्ट लेङ्लेटले ह्यान्ड गरेपछि बेटिसले पेनाल्टीको मौका पाएको थियो । जसलाई सर्जियोले सदुपयोग गरेका थिए । नवौं मिनेटमा फ्रान्की डि जोङले कप्तान लियोनले मेस्सीको पासमा गोल गर्दै खेललाई १–१ गोलको बराबरीमा ल्याए ।

२६औं मिनेटमा नविल फेकिरले गोल गरेपछि बेटिसले खेलमा पुनः २–१ को अग्रता बनायो । पहिलो हाफको इन्ज्युरी समयको थप गरिएको दोस्रो मिनेटमा मेस्सीकै पासमा सर्जियो बुस्स्क्वेट्सले गोल गर्दै खेललाई २–२ गोलको बराबरीमा ल्याए ।

७२औं मिनेटमा मेस्सीकै पासमा लेङ्लेटले गोल गर्दै बार्सिलोनालाई पहिलोपटक खेलमा ३–२ को अग्रता दिलाए । त्यसपछि दुवै टोली १० खेलाडीमा समेटिएको थियो । ७६औं मिनेटमा बेटिसका नविल फेकिर दोहोरो पहेँलो कार्ड खादै मैदानबाट बाहिरिए ।

७९औं मिनेटमा क्लेमेन्ट लेङ्लेट पनि दोहोरो पहेँलो कार्ड खादै मैदानबाट बाहिरिदा बार्सिलोना पनि १० खेलाडीमा समेटियो । त्यसपछि थप गोल निस्कन नसक्दा बार्सिलोनाले खेलमा ३–२ को संघर्षपुर्ण जित निकाल्यो ।

जितसँगै बार्सिलोनाले शीर्षस्थानको रियाल म्याड्रिडलाई पछ्याइरहेको छ । बार्सिलोनाको २३ खेलबाट ४९ अंक छ । उति नै खेलबाट रियालको ५२ अंक छ । रियल बेटिस २८ अंक जोडेर १३औं स्थानमा छ ।