एजेन्सी – सुपरस्टार फरवार्ड क्रिस्टियानो रोनाल्डोले कीर्तिमानी गोल गरेपनि इटालियन जाइन्ट युभेन्टस इटालियन सिरी ‘ए’ मा हेलास भेरोनासँग स्तब्ध बनेको छ । युभेन्टस घरेलु टोलीसँग २–१ ले स्तब्ध बनेको हो ।

हारसँगै युभेन्टसले शीर्षस्थानमा अग्रता बढाउने अवसर गुमायो । हारपछि युभेन्टसको २३ खेलबाट ५४ अंक रहेको छ । एक खेल कम खेलेको इन्टर मिलानको ५१ अंक छ । हेलास भेरोना ३४ अंक जोडेर छैटौ स्थानमा उक्लिएको छ ।

भेरोनामा शनिबार राति भएको खेलमा घरेलु टोलीको जितमा फावियो बोरिनी र जियामपाओलो पाजिनीले गोल गरे । रोनाल्डोले गरेको सान्त्वना गोल बन्यो । खेलको २१औं मिनेटमा मारस कुम्बुलाले गरेको गोलले भिएआरबाट मान्यता नपाउदा घरेलु टोली अग्रता लिनबाट चुक्यो ।

६५औं मिनेटमा रोनाल्डोले गोल गर्दै युभेन्टसलाई अग्रता दिलाए । उनले रोड्रिगो बेन्टानकरको पासमा गोल गरेका थिए । भेरोनाविरुद्ध गोल गर्दै रोनाल्डोले सिरी ‘ए’ मा लगातार १० खेलमा गोल गर्ने कीर्तिमान बनाएका छन् । उनी युभेन्टसबाट सिरी ‘ए’ मा लगातार १० खेलमा गोल गर्ने पहिलो खेलाडी बने ।

यससँगै ७६औं मिनेटमा फावियो बोरिनीले गोल गर्दै खेललाई १–१ गोलको बराबरीमा ल्याए । ८६औं मिनेटमा जियामपाओलो पाजिनीले पेनाल्टीमा गोल गर्दै भेरोनालाई २–१ को अग्रता दिलाए । लियोनार्दाे बोनुचीले पेनाल्टी बक्समा ह्यान्ड गरेपछि भेरोनाले पेनाल्टीको मौका पाएको थियो । त्यसपछि थप गोल निस्क्न नसक्दा युभेन्टस २–१ ले स्तब्ध बन्न पुग्यो ।

अन्य नतिजा

रोमाविरुद्ध बोलोग्ना (२–३)

फियारेन्टिनाविरुद्ध एटलान्टा (१–२)

टोरिनोविरुद्ध साम्पडोरिया (१–३)