काठमाडौं (हाम्रो खेलकुद)– प्रभु बैंक जावलाखेल युथ क्लब शनिबारको खेलमा सफलता हासिल गर्दै कतार एयरवेज सहिद स्मारक ए डिभिज लिगको पाँचौं स्थानमा उक्लेको छ । सातदोबाटोस्थित एन्फा कम्प्लेक्सको मैदानमा जावलाखेलले एनआइबिएल फ्रेन्ड्स क्लबमाथि १–० को जित हासिल गदैं अंक तालिकामा नेपाल पुलिस क्लबलाई पछि पार्दै पाँचौं स्थानमा उक्लेको हो ।

जावलाखेलले ११ खेलमा ५ जित ३ बराबर र ३ खेलमा हार बेहोरेको छ । फोडे फोफानाले गरेको गोल नै खेलको निर्णायक बनेको थियो । उनले ६२ औं मिनेटमा गोल गरेका थिए । फ्रेन्ड्सले १० खेलाडीमा सिमित हुँदै खेलको अन्त्य गरेका थिए । ६२ औं मिनेटमा साउल डी अक्विनोले रातो कार्ड पाउँदै मैदान छाडेका थिए । फेन्ड्स १४ अंकसहित नवौं स्थानमा छ ।

त्यसअघिको खेलमा च्यासल युथ क्लबलाई ३–२ ले हराउँदै यति हिमालयन शेर्पाले रेलिगेसन सम्भावनालाई लगभग टारेको थियो । लिगमा दोस्रो जित हासिल गर्दै हिमालयन शेर्पा ११ औं स्थानमा उक्लेको छ । शेर्पाले ११ खेलमा ४ खेलमा बराबरी र ५ खेलमा हार बेहोरेको थियो ।

नेपाल आयल निगम मनाङ मस्र्याङ्दी क्लब र न्यूरोड टिम (एनआरटी) बीच शनिबार दिउँसो ३ः०० बजेका लागि तय खेल प्राविधिक कारण स्थिगित गरिएको अखिल नेपाल फुटबल संघ (एन्फा) ले जनाएको थियो । त्यो खेल हलचोकस्थित एपिएफको मैदानमा तय थियो ।

तर, अन्तिम समयमा आएर एन्फाले स्थगित गरिएको जानकारी गराएको छ । आजको लागि तय खेल भोली एन्फा कम्प्लेक्स सातदोबाटोमा आइतबार १ः०० बजे हुने एन्फाले जनाएको छ । १० खेलमा मनाङको १९ अंक छ र टोली चौथो स्थानमा छ । एनआरटी भने १५ अंक सहित आठौं स्थानमा छ ।