काठमाडौं (हाम्रो खेलकुद)– कतार एयरवेज शहिद स्मारक ए डिभिजन लिग फुटबलको एघारौ चरणको पहिलो खेलमा बिहीबार शीर्ष स्थानको मछिन्द्र क्लब र पुछारको सरस्वती युथ क्लवबीच प्रतिस्पर्धा भैरहेको छ ।

सातदोबाटोस्थित एन्फा कम्प्लेक्सको जारी खेलको पहिलो हाफको समाप्तीमा मछिन्द्रले १–० ले अग्रता लिएको छ । ४०औं मिनेटमा देवेन्द्र तामाङले गोल गर्दै मछिन्द्रलाई अग्रता दिलाएका थिए । रन्जित धिमालको कर्नरमा देवेन्द्र हेडमार्फत गोल गर्न सफल भएका हुन् ।

त्यसअघि खेलको ११औं मिनेटमा बिशाल राई बीको क्रसमा विशाल राई एको प्रहार पोस्टबाट थोरै बाहिरियो । १९औं मिनेटमा कप्तान विराज महर्जनको पासमा रन्जित धिमालको प्रहार सरस्वतीका गोलरक्षक प्रदिप भण्डारीले बचाए ।

२३औं मिनेटमा विजय धिमालले एकल प्रयासमा गरेको प्रहार आकासियो । ३३औं मिनेटमा विशाल बी को फ्रिकिक बाहिरियो । आजको खेलमा मछिन्द्र सरस्वतीलाई पराजित गर्दै उपाधि होडमा बलियो बन्न चाहान्छ । बराबरीको नतिजाले पनि मछिन्द्रको उपाधि होडमा धक्का लाग्नेछ ।

यता सरस्वती भने मछिन्द्रलाई हराउने वा बराबरीमा कोशिसमा हुनेछ । सरस्वतीका कप्तान दिपेश श्रेष्ठले खेल मिलेमोतको प्रस्ताव गरेको आशंकाका अनुसन्धान जारी रहेकोले लिगका बाँकी तीनै खेलमा निलम्बनमा छन् ।