काठमाडौं (हाम्रो खेलकुद) – एनआइबिएल फ्रेन्ड्स क्लबले कतार एयरवेज सहिद स्मारक ए डिभिजन लिगको शीर्ष छैटौं मा पर्ने योजनालाई बलियो पार्ने क्रममा मंगलबार न्युरोड टिम (एनआरटी) माथि जित हासिल गरेको छ ।

१० औं चरणेको अन्तिम खेलको अन्त्य तिर गोल गर्दै फ्रेन्ड्सले एनआरटीलाई २–० ले हराएको हो । सातदोबाटोस्थित एन्फा कम्प्लेक्सको मैदानमा सन्जोग महर्जनको गोलबाट फ्रेन्ड्सले ७८ औं मिनेटमा अग्रता लिएको थियो ।

साउलो डि अक्विनोको लामो पासमा नवीन गुरुङले राम्ररी क्लियर गर्न नसकेको बललाई दिएको ब्याक पासमा सन्जोगले गरेको प्रहार गोलमा परिणत भएको थियो ।८० औं मिनेटमा वाग्नर डि कार्मोले गोल गर्दै फ्रेन्ड्सको अग्रता दोब्बर पारे । कार्मोले एकल प्रयासमा गरेको प्रहार गोलरक्षक अजित प्रजापतिलाई लाग्दै गोलमा परिणत भएको थियो ।

खेलमा फ्रेन्ड्सले थप गोलको अवसर भने सदुपयोग गर्न सकेन । १५औं मिनेटमा जोर्डन ओओनाको पासमा जुनियर निकेङ्गेको प्रहार पोस्टबाट थोरै बाहिरियो । ५० औं मिनेटमा वाग्नर डि कार्मोको प्रहार पोस्टबाट थोरै बाहरियो ।

लगत्तै वाग्नरको वासमा फिलिपे डि सोउजाको प्रहार पोलमा लाग्दै बाहिरियो । ६०औं मिनेटमा दुई ब्राजिलीको तालमेलमा वाग्नरले गोल गर्ने सुन्दर मौका खेर फाले । फिलिपेको पासमा वाग्नरको प्रहार एनआरटीका गोलरक्षक अजित प्रजापतिले मुस्किलले नियन्त्रणमा लिए ।

जितपछि १४ अंक पुगेको फ्रेन्ड्स च्यासल युथ क्लबलाई पछि पार्दै नवौं स्थानमा उक्लेको छ । आठौं स्थानको नेपाल पुलिस क्लबको पनि समान १४ अंक नै छ । एनआरटी १५ अंकसहित सातौं स्थानमा छ । लिगमा बुधबार विश्राम रहेको अखिल नेपाल फुटबल संघ (एन्फा) ले जनाएको छ । ११ औं चरणका खेल बिहीबार सुरु हुनेछ ।