एजेन्सी – पोर्चुगिज फरवार्ड क्रिस्टियानो रोनाल्डोले पेनाल्टीमार्फत दुई गोल गरेपछि इटालियन सिरी ए मा आइतबार युभेन्टसले फिओरेन्टिनालाई ३-० ले पराजित गरेको छ ।

रोनाल्डोले लगातार नवौं लिग खेलमा गोल गरेका हुन् । यसक्रममा उनले पछिल्ला ९ लिग खेलमा १४ गोल गरेका छन् । समग्रमा उनी लिगमा मात्र युभेन्टसका लागि १९ गोल गर्न सफल भएका छन् । रोनाल्डो सन् २००५ मा डेविड ट्रेजेग्वेटपछि लगातार ९ खेलमा गोल गर्ने पहिलो खेलाडी बने ।

रोनाल्डोले खेलको ४० औं मिनेटमा पहिलो पेनाल्टी गोल गर्दै युभेन्टसलाई अग्रता दिलाएका थिए । मिरालेम प्यानिचको प्रहार पेनाल्टी क्षेत्रभित्र रहेका जर्मन पेजेलाको हातमा लागेपछि रेफ्रीले पेनाल्टी दिएका थिए । त्यसअघि युभेका गोलरक्षक वोजचिएक सेचेज्नीले पोल लिरोला र एरिक पुल्गारको प्रहार बचाएका थिए ।

८० औं मिनेटमा रोनाल्डोकै पेनाल्टीमा अग्रता दोब्बर भयो । रोड्रीगो बेन्टान्कुरलाई फेदेरिको केचेरिनीले पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । रोनाल्डोले पहिलो पेनाल्टी गोल गरेकै दिशामा गोल गरेका थिए । खेलको अन्त्यतिर माथिस डे लिग्टले पाउलो डीबालाको फ्रिकिकमा गोल गर्दै जित सुनिश्चित गरे ।

यस जितसँगै युभेन्टसले लिगको शीर्षस्थानमा अग्रता कायमै राखेको छ । युभेन्टसको २२ खेलमा ५४ अंक छ भने लाजियोको २१ खेलमा ४९ र इन्टरको २१ खेलमा नै ४८ अंक रहेको छ ।