एजेन्सी – पोर्चुगिज मिडफिल्डर ब्रुनो फर्नान्डेजले इंग्लिस प्रिमियर लिगमा ‘डेब्यु’ गरेको खेलमा म्यानचेस्टर युनाइटेड वल्भ्ससँग बराबरीमा रोकिएको छ । शनिबार राति घरेलु मैदान ओल्ड ट्राफोर्डमा युनाईटेडले उल्भ्ससँग गोल रहित बराबरी खेल्दै अंक बाँडेको हो ।

घरेलु मैदानमा बल पोजेसन राखेपनि वल्भ्समाथि कुनै गतिलो आक्रमण बुन्न नसक्दा युनाइटेडले गोल गर्न असफल बन्दा बराबरीमा रोकिन बाध्य बन्यो । खेलको पाँचौ मिनेटमा रोमेन सेइसको कर्नर बारमा लागेर फर्कदा वल्भ्सले खेलमा अग्रता बनाउनबाट चुक्यो । २०औं मिनेटमा माट दोहर्थीको अर्काे कर्नरलाई युनाइटेडका गोलरक्षक डेभिड डि गेयाले बचाए ।

३३औं मिनेटमा विन्टरमा युनाइटेड आएका ब्रुनो फर्नान्डेजले गरेको प्रहार पोस्टबाट थोरै बाहिरियो । ३९औं मिनेटमा लुका साको पासमा फर्नान्डेजको अर्काे प्रहारले पोस्टको गति लिन सकेन । ५०औं मिनेटमा डिएगो जोटाको ब्याक हिल प्रहारलाई आरोन वान विशाखाले क्लियर गरिदिए ।

५८औं मिनेटमा फर्नान्डेजको फ्रिकिकलाई वल्भ्सका गोलरक्षक रुइ प्याट्रिसियोले बचाए । ६०औं मिनेटमा हुवान माटाको प्रहार पोस्टमा लागेर फर्कदा युनाइटेड अग्रता लिनबाट चुक्यो । ७२औं मिनेटमा एन्ड्रिएस पेरेराको प्रहारलाई गोलरक्षक प्याट्रिसियोले बचाए ।

७८औं मिनेटमा मासन ग्रीनवुडको प्रहारमा प्याट्रिसियो पुनः बाधक बन्दा युनाइटेड चुकचुकायो । इन्ज्युरी समयमा युनाइटेडले लगातार आक्रमण बुनेपनि युनाइटेडले वल्भ्सको बलियो रक्षापङ्ति तोड्न नसक्दा बराबरीमा रोकिन बाध्य बन्यो । विन्टरमा ६८ मिलियन पाउण्डमा युनाइटेड आएका फर्नान्डेजले प्रभाव देखाउन असफल रहे ।

बराबरीपछि युनाइटेड २५ खेलबाट ३५ अंक जोडेर छैटौ स्थानमा रहेको छ । ३५ अंक नै रहेको वल्भ्स सातौ स्थानमा छ । ओले गुनर सोल्सायरको टिमले पछिल्ला पाँच खेलमा मात्र चार अंक बटुलेको छ ।

यस्तै शनिबार राति नै भएको खेलमा चेल्सी र लेष्टर सिटीले २–२ गोलको बराबरी खेल्दै अंक बाडेको छ । चेल्सीका लागि दुवै गोल एन्टेनियो रुडिगरले गरे । लेस्टरका हार्भे वार्नेस र बिन चलिवालले गोल गरे । बराबरीसँगै चेल्सी २५ खेलमा ४१ अंक जोडेर चौथो स्थानमा यथावत रहेको छ । लेष्टर ४९ अंक जोडेर तेस्रो स्थानमा छ ।

अन्य नतिजा

बर्नमाउथविरुद्ध एस्टन भिल्ला (२–१)

क्रिस्टल प्यालेसविरुद्ध सेफिल्ड युनाइटेड (०–१)

लिभरपुलविरुद्ध साउथ ह्याम्पटन (४–०)

न्यु क्यासलविरुद्ध नर्विच सिटी (०–०)

वाटफोर्डविरुद्ध एभर्टन (२–३)

वेस्टह्यामविरुद्ध ब्राइटन (३–३)