एजेन्सी – डिफेन्डिङ च्याम्पियन बायर्न म्युनिख जर्मन बुन्डेस लिगाको शीर्षस्थानमा पूनरागमन गरेको छ । घरेलु टोली मेइन्जमाथि ३–१ को जित निकाल्दै बायर्नले शीर्षस्थानमा पूनरागमन गरेको हो ।

शनिबार राति बायर्नले जित निकाल्दा शीर्षस्थानमा रहेको आरबी लेइजिग बोरुसिया मोन्चेनग्लाडवाचसँग बराबरीमा रोकिएपछि बायर्नले शीर्षस्थानमा पूनरागमन गर्न सफल भएको हो । बायर्नको २० खेलबाट ४२ अंक छ । उति नै खेलबाट आरबी लेइपजिगको ४१ अंक छ ।
घरेलु टोलीविरुद्ध बायर्नको जितमा रोवर्ट लेवान्डोस्की, थोमस मुलर र थियागो अलकान्ताराले गोल गरे । मेइन्जका जेरी जस्टेले सान्त्वना गोल फर्काए ।

बायर्नले खेलको २६ मिनेट भित्रै ३–० को आरामदायी अग्रता बनाएको थियो । आठौं मिनेटमा बेन्जामिन पाभार्डको पासमा लेवान्डोस्कीले गोल गर्दै बायर्नलाई अग्रता दिलाए । यो उनको जारी बुन्डेस लिगाको २२औं गोल हो ।  १४औं मिनेटमा थोमस मुलरले लियोन गोरेट्काको पासमा गोल गर्दै बायर्नको अग्रता दोब्बर पारे । २६औं मिनेटमा अलफोन्सो डेभिसको पासमा थियागो अलकान्ताराले गोल गरेपछि बायर्नले २६ मिनेटभित्रै ३–० को आरामदायी अग्रता बनायो ।

४५औं मिनेटमा घरेलु टोलीका जेरीले एक गोल गर्दै खेलमा फर्कने संकेत दिएका थिए । तर, त्यसपछि दोस्रो हाफमा दुवै टोलीले गोलका केही अवसर सिर्जना गरेपछि गोल निस्कन नसक्दा बायर्न ३–१ ले विजयी हुन सफल भयो ।

अर्काे खेलमा आरबी लेइपिजिग र बोरुसिया मोन्चेनग्लाडवाचले २–२ गोलको बराबरी खेल्दै अंक बाँडे । बराबरीपछि लेइपजिगले शीर्षस्थान गुमायो । मोन्चेनग्लाडवाच ३९ अंक जोडेर चौथो स्थानमा रहेको छ ।

लेइपजिगले २–० ले पछि परेको अवस्था उल्ट्याउदै बराबरी गर्न सफल भएको हो । आरबी लेइपजिगका प्याट्रिक सेचिक र क्रिस्टोफोर एनकुन्कुले गोल गरे । मोन्चेनग्लाडवाचका एलासेन प्लिए र जोनस होफमानले गोल गरे । ६१औं मिनेटमा मोन्चेनग्लाडवाच १० खेलाडीमा समेटिएको थियो ।