एजेन्सी – स्पेनिस ला लिगा अन्तर्गत सान्टियागो बर्नाबाउमा भएको म्याड्रिड डर्बीमा घरेलु टोली रियल म्याड्रिडले एटलेटिको म्याड्रिडलाई १-० ले पराजित गरेको छ ।

पहिलो हाफ गोलरहित बराबरीमा सकिएपछि खेलको दोस्रो हाफमा रियलले अग्रता लिएको थियो । खेलको ५६ औं मिनेटमा फ्रान्सेली फरवार्ड करीम बेन्जेमाले रियललाई अग्रता दिलाएका थिए । उनले फर्लान्ड मेन्डीको उत्कृष्ट क्रसमा गोल गर्दै घरेलु टोलीलाई अगाडी बढाएका थिए । बेन्जेमाले जारी लिगमा ५ खेलमा गोलविहिन रहेपछि गोल गरेका हुन् । उनले एटलेटिकोविरुद्ध घरेलु मैदानमा पनि पहिलो पटक गोल गरेका हुन् ।

रियलले दोस्रो हाफमा दुई खेलाडी परिवर्तन गरेपछि सुधारिएको प्रदर्शन गरेको थियो । इस्को र टोनी क्रुसको स्थानमा भिनीसियस जुनियर र लुकास भाज्केज आएपछि रियल जिततर्फ लम्किएको थियो । पहिलो हाफमा रियल दवावमा रहेपनि एटलटिकोले अग्रता लिन सकेको थिएन । अल्भारो मोराटा घाइते भएपछि घरेलु टोलीलाई केहि सहज भएको थियो ।

यस जितसँगै रियल म्याड्रिडले शीर्षस्थानमा ६ अंकको अग्रता बनाएको छ । रियलको २२ खेलमा ४९ अंक रहेको छ । दोस्रो स्थानको बार्सिलोनाले २१ खेलमा ४३ अंक जोडेको छ । बार्सिलोनाले आइतबार हुने खेलमा लेभान्तेको सामना गर्नेछ ।

यो पनि पढ्नुहोस : हालान्ड चम्कँदा डर्टमुन्डको फराकिलो जित