एजेन्सी – नर्वेली युवा फरवार्ड एर्लीङ हालान्डले आफ्नो उत्कृष्ट लयलाई निरन्तरता दिँदा बोरुसिया डर्टमुन्डले जर्मन बुन्डेसलिगामा युनियन बर्लिनलाई ५-० को फराकिलो अन्तरले पराजित गरेको छ ।

डर्टमुन्डका लागि समग्रमा तेस्रो र पहिलो रोजाईमा रहेर डेब्यु गरिरहेका हालान्डले दुवै हाफमा १-१ गोल गरे । राफेल गुरेरोको पासमा जेडन सान्चोले गोल गर्दै घरेलु टोली डर्टमुन्डलाई अग्रता दिलाएका थिए । त्यसको ५ मिनेटपछि नै हालान्डले डर्टमुन्डको अग्रता दोब्बर पारे । उनले जुलियन ब्रान्टको पासमा गोल गरे ।

दोस्रो हाफको ६८ औं मिनेटमा कप्तान मार्को रिउसले पेनाल्टीमा गोल गर्दै डर्टमुन्डको जित सुनिश्चित गरे । त्यसको दुई मिनेट नबित्दै सान्चोको पासमा मिडफिल्डर एक्सल विटसलले गोल थप्दै ४-० को अग्रता दिलाए । ७६ औं मिनेटमा ब्रान्टकै पासमा हालान्डले व्यक्तिगत दोस्रो गोल गरे ।

हालान्डले डर्टमुन्ड आएयता टोलीका लागि ३ खेलमा ७ गोल गरिसकेका छन् । उनले यसक्रममा मात्र १ सय ३५ मिनेट खेलेका छन् । १९ वर्षीय फरवार्डले ७ गोल गर्ने क्रममा मात्र ८ सट प्रहार गरेका छन् ।

यस जितसँगै तेस्रो स्थानमा रहेको डर्टमुन्डले लिगको २० खेलमा ३९ अंक जोडेको छ । शीर्षस्थानमा रहेको लाइप्जिगले १९ खेलमा ४० तथा दोस्रो स्थानको बायर्नले १९ खेलमा ३९ अंक जोडेको छ । चौथो स्थानको बोरुसिया मोन्चेनग्लाडबाकको १९ खेलमा ३८ अंक छ ।