एजेन्सी – इटालियन सिरी ‘ए’ क्लब युभेन्टस तथा जर्मनीका मिडफिल्डर इम्री क्यान जर्मन बुन्डेस लिगा क्लब बोरुसिया डर्टमन्ड फर्किएका छन् । क्यानलाई २५ मिलियन पाउन्डमा विन्टर सिजनको अन्तिम दिन डर्टमन्डले क्लबमा अनुबन्ध गरेको हो ।

क्यानलाई म्यानचेस्टर युनाइटेड, टोटेनहम हस्टपर, आर्सनल र पुर्व क्लब बायर्न म्युनिखले अनुबन्धको लागि चासो देखाएपनि डर्टमन्डले बाजी मारेको हो । डर्टमन्डले क्यानलाई सुरुवातमा लोनमा र त्यसपछि स्थायी हुने गरी २५ मिलियन पाउन्डमा अनुबन्ध गरेको हो ।

क्यानले युभेन्टसको अफरलाई अस्वीकार गर्दै डर्टमन्ड रोजेको हो । डर्टमन्डले यसअघि नर्वेका १९ वर्षीय युवा प्रतिभा अर्लिङ हाल्यान्डलाई रेडबुल साल्जवर्गबाट अनुबन्ध गरेको थियो । उनले शुरुवाती दुई खेलमा सब्सिच्युट खेलाडीको रुपमा मैदानमा प्रवेश गर्दै ५ गोल गरेर आफ्नो प्रभाव जमाएका छन् ।

यससँगै क्यान आफ्नो घर फर्कने भएका छन् । बायर्न म्युनिखबाटै व्यावसायिक करियर शुरु गरेका क्यानले बायर्न म्युनिख र बायर लिभरकुसेनबाट खेलेका थिए । लिभरकुसेनबाट २०१४ मा क्यान इंग्लिस क्लब लिभरपुल पुगेका थिए ।

२६ वर्षीय क्यान २०१८ मा लिभरपुल छाड्दै युभेन्टस पुगेका थिए । उनले सिरी ‘ए’ मा मात्रै आठपटक सुरुवातमा मौका पाएका छन् । डर्टमन्ड बुन्डेस लिगाको चौथो स्थानमा छ ।