एजेन्सी – स्पेनिस कोपा डेल रे अन्तर्गत बुधबार रियल म्याड्रिडले रियल जारागोजाको मैदानमा ४-० को सानदार जित दर्ता गर्दै क्वाटरफाइनलमा प्रवेश गरेको छ । रियलको जितमा दुवै हाफमा २-२ गोल सम्भव भएको थियो ।

खेलको छैटौं मिनेटमा रियलले राफेल भारानको गोलमा अग्रता लिएको थियो । टोनी क्रुसको क्रसमा भिनिसियस बिट हुँदा फार पोस्टमा‌ रहेका भारानले सहजै गोल गरे । पहिलो हाफको मध्यतिर जारागोजा बराबरी गर्नबाट बञ्चित भयो । मिडफिल्डर सिन्जि कागावाको प्रहारलाई गोलरक्षक अल्फोन्स आरीअोलाले उत्कृष्ट बचाउ गरे ।

जारागोजाले लगातार दवाव कायम गरिरहँदा नै रियलले पुन: खेलमा पकड बनायो । ३२ अौं मिनेटमा मिगुएल लारानेसबाट क्रुसले मिडफिल्डमा बल खोस्दै लुकास भाज्केजलाई दिएको पासमा भाज्केजले गोल गरे ।

दोस्रो हाफको सुरुवात देखिनै जारागोजाले केहि दवाव सिर्जना गर्यो । तर आरीअोला लगातार बाधक बन्दा कुनै गोल निस्केन । ७२ अौं मिनेटमा भिनिसियसले गोल गर्दै रियलको जित सुनिश्चित गरे । उनले हामेस रोड्रीग्वेजसँग १-२ पास खेल्दै गोलरक्षकलाई चिप गर्दै अग्रता बढाए ।

वैकल्पिक खेलाडीका रूपमा मैदान छिरेका फ्रान्सेली फरवार्ड करीम बेन्जेमाले ८० अौं मिनेटमा ४-० को स्कोर बनाए । उनले ड्यानी कार्भाजलको उत्कृष्ट क्रसमा गोल गरे ।

यससँगै रियल अन्तिम ८ मा प्रवेश गरेको छ । प्रतियोगिताको आज हुने खेलमा बार्सिलोनाले लेगानेसको सामना गर्नेछ ।