काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तरगत नवौं राउन्डको तेस्रो दिन आज (बुधबार) एक खेल मात्रै हुदैछ । सातदोबाटोस्थित एन्फा कम्प्लेक्सको खेल मैदानमा हुने खेलमा गतवर्षको विजेता मनाङ–मस्र्याङ्दी क्लब र संकटा क्लब आमने–सामने हुदैछ ।

खेल दिउँसो ३ बजेपछि हुनेछ । लिगमा अपराजित एक्लो मनाङ संकटाविरुद्ध जित निकाल्दै उपाधि होडमा कायमै रहन चाहन्छ । ८ राउन्डसम्म ४ जित र ४ बराबरीको नतिजा निकाल्दै १६ अंक जोडेको मनाङ तेस्रो स्थानमा छ । यस्तोमा मनाङ संकटालाई पराजित गर्दै शीर्ष दुई टोली आर्मी र मछिन्द्र क्लबसँगको अंक दुरी छोट्याउदै उपाधि होडमा उभिन चाहन्छ । शीर्ष टोली आर्मीको ९ खेलबाट २० तथा मछिन्द्रको १९ अंक छ ।

अघिल्लो वर्ष लिग जित्दाका महत्वपुर्ण खेलाडीले क्लब छाडेपछि नयाँ र युवा खेलाडीलाई समावेश गरेको मनाङले उत्कृष्ट खेल पस्कन नसकेपनि नतिजा भने निकाल्न सफल भएको छ ।

त्यही नतिजा संकटाविरुद्ध दोहो¥याउने दाउमा मनाङ हुनेछ । मनाङसँग रन्जन विष्ट, अन्जन विष्ट, बिमल राना, दयानन्द सिंह, दीप कार्की, लुइस भिडाल र पुजन उपरकोटीजस्ता खेलाडीको साथ छ ।

यता, संकटा पनि मनाङको अपराजित यात्रालाई ब्रेक गर्दै ३ अंक जोड्ने दाउँमा हुनेछ ।  लिगमा ८ खेल खेलेको संकटाको १२ अंक छ । संकटासँग लक्ष्मण रुचाल, सुवास गुरुङ, सरोज दाहाल, कर्ण लिम्बु, विष्णु सुनार, राजेन्द्र रावल, अमित तामाङ र दिपेश आलेमगरसँगै प्रोलाद रोय, अर्नेष्ट टम्पी जस्ता विदेशी खेलाडीको साथ छ । आठौं स्थानमा रहेको संकटा मनाङलाई पराजित गर्दै पाँचौं स्थानमा उक्लने छ ।

गत वर्ष मनाङले संकटालाई ३–१ ले पराजित गरेको थियो । मनाङ सोही जितलाई निरन्तरता दिने दाँउमा तथा संकटा गतवर्षको हारको बदला लिने लक्ष्यमा मैदानमा उत्रनेछ । मनाङ र संकटाबीचको खेल रोचक हुने अपेक्षा गरिएको छ ।