काठमाडौं (हाम्रो खेलकुद)– कतार एयरवेज सहिद स्मारक ए डिभिजन लिगको अंक तालिकाको तल्लो क्रममा रहेका यति हिमालयन शेर्पा र सरस्वती क्लबबीचको पहिलो हाफ २–२ को बराबरीमा टुंगिएको छ । सरस्वतीले दुई पटकको अग्रतालाई जोगाउन सकेन ।

सातदोबाटोस्थित एन्फा कम्प्लेक्सको मैदानमा जारी खेलकोखेलको पाँचौै मिनेटमा काजिम बुसारीले गोल गर्दै सरस्वतीलाई अग्रता दिलाए । निशान माझीको क्रसमा विनोद केसीले प्रहार गरेपनि शेर्पाका कप्तान मान बहादुर तामाङले ब्लक गरेपनि पुर्ण बहादुर श्रेष्ठको क्रसमा बुसारीले गोल गरेका हुन् ।

१० औं मिनेटमा आशिष गुरुङले गोल गर्दै शेर्पालाई बराबरीमा ल्याए । रवि थापाको फ्रिकिकमा आशिषले हेडिङ गोल गर्न सफल भएका थिए । २० औं मिनेटमा शेर्पाका गोलरक्षक किशोर गिरीले सरस्वतीको प्रहारलाई मुस्किलले पञ्च गर्दै बचाए ।

३५औं मिनेटमा विनोद केसीले गोल गर्दै सरस्वतीलाई २–१ को अग्रता दिलाए । बुसारीले अलरिच सिवेलाई बिट गर्दै दिएको उत्कृष्ट क्रस पासमा गोलरक्षक समेत विट भएको अवस्थामा विनोदले खाली पोस्टमा गोल गर्न सफल भएका थिए । ४५ औं मिनेटमा विजय श्रेष्ठले गोल गर्दै खेललाई २-२ गोलको बराबरीमा ल्याए । १४ टोलीको सहभागिता रहेको लिगमा शेर्पा १२ औं र सरस्वती पुछारमा रहेको छ ।