एजेन्सी – लन्डन क्लब चेल्सी एफए कपको पाँचौ चरणमा प्रवेश गर्न सफल भएको छ । चेल्सीले च्याम्पियनसिप क्लब हल सिटीलाई २–१ ले पराजित गर्दै एफए कपको पाँचौ चरणमा पुग्न सफल भएको हो ।

केसीओम स्टेडियममा शनिबार राति भएको खेलमा चेल्सीको जितमा मिचे बात्सुयाई र फिकायो तोमोरीले गोल गरे । हलका कामिल ग्रोसिकीले सान्त्वना गोल फर्काए । खेलको छैटौ मिनेटमा नै बात्सुयाईको गोलबाट अग्रता बनाएको थियो । कप्तान सिजर एजपिलिक्वेटाको क्रसमा मासन माउन्टको हेडरलाई ब्लक गरेपनि रायन ताफाजोलीबाट डिफ्लेक्सन भएको बललाई बात्सुयाईले गोलमा परिणत गरेका थिए ।

१६औं मिनेटमा रोस बार्कलेको प्रहारलाई हलका गोलरक्षकल बचाए । ३३औं माटियो कोभासिसको प्रहारलाई बचाउदा चेल्सी अग्रता दोब्बर पार्नबाट चुक्यो । ३५औं मिनेटा हलका टोम इभेसले बराबरीको अवसर खेर फाल्यो ।  ५९औं मिनेटमा जारोड वोवेनको प्रहार क्रसबारमा लागेर बाहिरियो । ६४औं मिनेटमा चेल्सीले अग्रता दोब्बर बनायो । रोस बार्कलेको फ्रिकिकलाई फिकायो तोमोरीले गोलमा परिणत गरेका थिए । ७०औं मिनेटमा चेल्सीका विलियन चुके ।

७८औं मिनेटमा घरेलु टोलीले एक गोल गर्दै खेलमा फर्कने संकेत दिए । कामिल ग्रोसिकीको फ्रिकिक डिफ्लेक्ट भएर आएको बललाई उनैले गोलमा परिणत गरेका थिए । त्यसपछि थप गोल निस्कन नसक्दा चेल्सी २–१ ले विजयी हुन सफल भयो ।

अन्य नतिजा

नर्थह्याम्पटनविरुद्ध डर्वी (०–०)

क्युपिआरविरुद्ध सेफिल्ड वेनस्डे (१–२)

ब्रेन्टफोर्डविरुद्ध लेस्टर सिटी (०–१)

बर्नलीविरुद्ध नर्विच सिटी (१–२)

कोभेन्ट्रीविरुद्ध बर्मिङघम (०–०)

मिलवालविरुद्ध सेफिल्ड युनाइटेड (०–२)

न्यु क्यासलविरुद्ध अक्सफोर्ड युनाइटेड (०–०)

पोर्ट्समाउथविरुद्ध ब्रान्सले (४–२)

रिडिङविरुद्ध कार्डिफ (१–१)

साउथह्याम्पटनविरुद्ध टोटेनहम (१–१)

वेस्टह्यामविरुद्ध वेस्टब्रुम (०–१)