काठमाडौं (हाम्रो खेलकुद) – संकटा क्लबले कतार एअरवेज सहिद स्मारक ए डिभिजन लिगअन्तर्गत शनिबारको दोस्रो खेलमा फ्रेन्ड्स क्लबलाई पराजित गरेको छ । दशरथ रंगशालामा भएको दोस्रो खेलमा संकटा १-० ले विजयी रहयो ।

फ्रेन्ड्सले सुरुवाती समयमा संकटामाथि दवाव बनाएपनि पोस्टमा बलियो आक्रमण गर्न सकेन । खेलको २४ औं मिनेटमा संकटाले अग्रता लिने सुवर्ण अवसर गुमायो । पेनाल्टी क्षेत्रभित्र अनमार्क रहेको अवस्थामा उनको प्रहार आकासियो । ३० औं मिनेटमा फ्रेन्ड्सका विश्व अधिकारीको फ्रिकिकमा वाग्नर डे कार्मोको प्रहारले पोस्टको दिशा लिन सकेन ।

दोस्रो हाफमा संकटाले सुधारिएको प्रदर्शन गर्यो । ४७ औं मिनेटमा अमित तामाङको क्रसमा कर्ण लिम्बुको ब्याकहिल प्रहार पोस्टभन्दा केहि बाहिर गयो । ५५ औं मिनेटमा लक्ष्मण रुचालले २५ यार्ड टाढाबाट प्रहार गरेको सट पोस्टभन्दा माथि गयो ।

खेलको ६४ औं मिनेटमा संकटाले अजायी मार्टिन्स कायोदेको गोलमा अन्तत: अग्रता लियो । सुवास गुरुङले बायाँ विंगको कर्नर नजिकबाट प्रहार गरेको फ्रिकिकमा अजायीले हेडर मार्फत गोल गरेका थिए । त्यसपछि दुवै तर्फबाट गोल हुन नसक्दा संकटा विजयी भएको हो ।

यस जितसँगै संकटाले ८ खेलमा १२ अंक जोडेको छ । संकटाले ८ खेलमा ३ जित, ३ बराबरी र २ हार बेहोरेको छ । पाँचौ स्थानमा एनआरटि, जावलाखेल र संकटाको समान १२-१२ अंक रहेको छ । फ्रेन्ड्स भने ८ खेलमा ८ अंकसहित ११ औं स्थानमा सिमित छ ।