एजेन्सी – लेस्टर सिटी र टोटेनहम हस्टपरले इंग्लिस प्रिमियर लिगमा जित दर्ता गर्दा म्यानचेस्टर युनाइटेड बर्नलीसँग स्तब्ध बनेको छ । घरेलु टोली लेस्टरले वेस्टह्याममाथि ४–१ को जित निकालेको हो ।

लेस्टरको सानदार जितमा एयोजी पेरेजले दुई तथा हार्वे वारर्नेस र रिकार्डाे पेरेजले गोल गरे । वेस्टह्यामका मार्क नोब्लीले सान्त्वना गोल फर्काए ।
जितसँगै लेस्टर ४८ अंक जोडेर तेस्रो स्थानमा यथावत रहँदा वेस्टह्याम २३ अंक जोडेर १७औं स्थानमा रहेको छ ।

यस्तै टोटेनहम हट्सपरले नर्विच सिटीमाथि २–१ को संघर्षपूर्ण जित आत्मसाथ गरेको छ । डेली अलीले ३८औ मिनेटमा गोल गर्दै टोटेनहमलाई अग्रता दिलाएका थिए । टिमु पुक्कीले ७०औं मिनेटमा पेनाल्टीमार्फत बराबरी गोल फर्काए । ७९ औ मिनेटमा सन ह्युङ मिनले गोल गर्दै टोटेनहमलाई महत्वपूर्ण जित दिलाए ।

जितसहित टोटेनहम ३४ अंक जोडेर तालिकाको छैटौ स्थानमा उक्लिन सफल भएको छ । टोटेनहमले पाँचौ स्थानको म्यानचेस्टर युनाईटेडसँग अंक बराबरी गरेपनि गोल अन्तरमा पछि परेको हो । नर्विच १७ अंकसहित पुछारमा यथावत छ ।

बुधबार राति भएको खेलमा म्यानचेस्टर युनाइटेड बर्नलीसँग २–० ले स्तब्ध बनेको छ । क्रिस उड र जय रोडिग्वेजले गोल गरेपछि ओल्ड ट्राफोर्डमा बर्नलीले घरेलु टोलीमाथि शानदार जित निकालेको हो । हारसँगै प्रशिक्षक ओले गनर सोल्सायरमाथि दबाब थपिएको छ ।

३९औं मिनेटमा उडले गोल गर्दै बर्नलीलाई सुरुवाती अग्रता दिलाए । ५६औं मिनेटमा रोड्रिग्वेजले गोल गर्दै बर्नलीको जित सुनिश्चित गरे ।
हारसँगै युनाइटेड चौथो स्थानको चेल्सी भन्दा ६ अंकले पछि परेको छ । युनाइटेडको ३४ अंक छ । युनाइटेडलाई पराजित गरेको बर्नली ३० अंक जोडेर १३औं स्थानमा उक्लिएको छ ।