एजेन्सी – चोटका कारण फरवार्ड लुइस सुआरेज लामो समय मैदानबाहिर रहने भएपछि क्याटलान क्लब बार्सिलोना ट्रान्सफर विन्डोमा नयाँ खेलाडीको खोजीमा छ । यसका लागि टोलीले भ्यालेन्सियाका रोड्रीगो मोरेनोलाई अनुबन्ध गर्ने प्रयास थालेको छ ।

सुआरेजको अनुपस्थितिमा बार्सिलोना लिगमा सहजै खेल्न सक्ने फरवार्डको खोजीमा छ । नयाँ प्रशिक्षक किके सेटिनको योजनामा खेल्न पनि रोड्रीगोलाई सहज हुने विश्वास गरिएको छ । रोड्रीगो आफैं पनि बार्सिलोना जान इच्छुक रहेका छन् । तर दुई क्लबबीच ट्रान्सफर रकमलाई लिएर भने केहि असमझदारी देखिएको छ ।

भ्यालेन्सियाले रोड्रीगोका लागि कम्तिमा ६० मिलियन युरोको माग राखेको छ । तर बार्सिलोनाले यसअघि ट्रान्सफर विन्डोमा नै १ सय २४ मिलियन युरो खर्चेकाले आर्थिक पाटोमा समस्या हुने देखिन्छ । त्यसमाथि बार्सिलोनाले यसै साता भ्यालेन्सियाको सामना गर्दैछ । यसकारण पनि कम्तिमा उक्त खेलसम्म बार्सिलोनाले प्रतीक्षा गर्नुपर्नेछ ।

बार्सिलोनाले विकल्पका रुपमा आर्सनलका पिएर एमेरिक औबामेयाङ र जर्मन क्लब आरबी लाइप्जिगका टिमो वेर्नरलाई पनि हेरेको छ । तर दुवै खेलाडीलाई आ-आफ्नो क्लबले निकै महत्त्वपूर्ण भूमिकामा राखेको हुनाले बार्सिलोनाले मोटो रकम खर्चनुपर्ने छ ।

बार्सिलोनाले लोनमा केहि समयका लागि खेलाडी अनुबन्धन गर्ने सम्भावना भने निकै कम छ । गत सिजन केभिन प्रिन्स बोटेङलाई अनुबन्ध गरेपछि खासै उपलब्धि नहुनुले पनि बार्सिलोना सचेत छ ।

यो पनि पढ्नुहोस : एकै खेलमा १ हजार पास!