काठमाडौं (हाम्रो खेलकुद)– संकटा क्लब र बिग्रेड ब्वाइज क्लब (बिबिसी) ले कतार एयरवेज सहिद स्मारक ए डिभिजन लिगमा सोमबार गोलरहित बराबरी खेलेका छन् । सातदोबाटोस्थित एन्फा कम्प्लेक्सको मैदानमा भएको खेल अवधिभर दुवै टोलीले गोलका केहि अवसर पाएपनि सफल भने हुन सकेनन् ।

यद्दपी खेलमा संकटा तुलानात्मक रुपमा बलियो देखिएको थियो । बिबिसीका गोलकिपर विशाल सुनार केल्मे म्यान अफ द म्याच चुनिए । संकटाको ७ खेलपछि २ जित, ३ बराबरी र २ हारका साथ ९ अंक पुगेको छ । बिबिसीले २ जित, २ बराबरी र ३ हार बेहोर्दै ८ अंक पु¥याएको छ ।

बिबिसीले सोमबार भारतीय खेलाडी मोहम्मद सौकतलाई उतारेको थियो । दक्षिण एसियाली कोटा अन्तगर्त बिबिसीले भारतीय एक खेलाडीलाई टोलीमा आबद्ध गराएको हो । मोहम्मदले बिएसए स्पोर्टिङ क्लबबाट भारतको कोलकाता प्रिमियर लिग खेलेका थिए ।

अखिल नेपाल फुटबल संघ (एन्फा) को पछिल्लोको नियमावली अनुसार ए डिभिजन टोलीले लिगका लागि ४ विदेशी खेलाडी राख्न पाउने प्रावधान अनुरुप चौथो खेलाडी राख्दा एक जना दक्षिण एसियाली खेलाडी अनिवार्य गरेको छ ।

आर्मी र च्यासल भिड्दै

दरशथ रंगशालामा दिउँसो ३ बजे त्रिभुवन आर्मी क्लब र च्यासल युथ क्लबबीच प्रतिस्पर्धा सुरु हुनेछ । उपाधि दाबेदार आर्मी च्यासललाई पराजित गर्दै शीर्षस्थानमा स्पष्ट ३ अंकको अग्रता लिने लक्ष्यमा मैदानमा उत्रनेछ ।

गत साता संकटासँग १–१ गोलको बराबरीमा रोकिएपछि आर्मीले शीर्षस्थानमा उक्लने मौका गुमाएको थियो । कम्तिमा बराबरीको नतिजाले समेत आर्मी शीर्षस्थानमा उक्लनेछ । पराजित भएको अवस्थामा उपाधि सम्भावना जिवितै रहने भएपनि शीर्षस्थानमा उक्लने मौका गुमाउने छ ।आर्मीले ४ जित, १ बराबरी र १ हारबाट १३ अंक जोडेको छ ।

अर्कोतर्फ लिगमा १ सय गोलको आँकडा पार गरेका सन्तोष साहुखलको साथ पाएको च्यासल आर्मीलाई स्तब्ध पार्दै अंक तालिकामा सुधार गर्ने लक्ष्यमा हुनेछ । सुरुवाती दुई खेलमा दमदार सुरुवात गरेको च्यासलको प्रदर्शन त्यसपछि अपेक्षाकृत हुन सकेको छ । च्यासल ६ खेलबाट ६ अंक बटुल्दै तालिकाको १२औं स्थानमा छ ।