एजेन्सी – लिभरपुल प्रिमियर लिगको शीर्षस्थानमा थप मजबुत भएको छ । आइतबार म्यानचेस्टर युनाइटेलाई २–० ले हराउँदै लिभरपुल थप बलियो बनेको हो । प्रिमियर लिगमा लिभरपुलको यो लगातार १३ औं जित हो । 

यो सिजन २२ खेलमा अपराजित रहेको लिभरपुलले दोस्रो स्थानको म्यानचेस्टर सिटीलाई १६ अंकले पछाडि छाडेको छ । अझै लिभरपुलले सिटीले भन्दा एक खेल कम खेलेको छ । लिभरपुललाई जित दिलाउन भर्जील भान डाइक र मोहम्मद सलाहले गोल गरे । डाइकले १४ औं मिनेटमा हेडमार्फत गोल गरेका थिए । ट्रेन्ट अलेक्जेन्डरको कर्नरमा डाइकले हेडमार्फत गोल गरेका थिए ।

इन्जुरी समयको तेस्रो मिनेटमा काउन्टर एट्याकमा सलाहले गोल गर्दै टोलीको जित पक्का गरे । युनाइटेडले गोलको केहि अवसर पाएको थियो । तर सफल भएन । २२ खेलमा शीर्षस्थानको लिभरपुलको ६४ अंक छ । दोस्रो स्थानको सिटीलको ४८, लेस्टरको ४५, चौथो स्थानको चेल्सीको ३९ र पाँचौं स्थानको युनाइटेडको ३४ अंक छ ।

त्यसअघि दोस्रो हाफमा क्रिस उड र एस्ले वेस्टउडले गोल गरेपछि लेस्टरमाथि बर्नलीले लेस्टर सिटीलाई २–१ ले हराएको थियो । निक पोपले पेनाल्टी रोक्दै लेस्टरलाई दोस्रो पटक अग्रता लिनबाट रोकेका थिए । खेलमा भने लेस्टरले अग्रता लिएको थियो । हार्भे बार्न्सले ३३ औं मिनेटमा गोल गर्दै लेस्टलाई अग्रता दिलाएका थिए ।

उडले ५६ औं मिनेटमा बराबरी गोल फर्काएका थिए । जेमी भार्डीको पेनाल्टी प्रहारलाई पोपले रोक्दै लेस्टरलाई अग्रता लिन दिएनन् । वेस्टउडले ७९ औं मिनेटमा गोल गर्दै बर्नलीलाई जित दिलाए । पाँचौं खेलमा पहिलो जित हासिल गरेको बर्नली २७ अंकसहति १४ औं स्थानमा उक्लेको छ । छैटौं खेलमा चौथो हार बेहोरेको लेस्टर ४५ अंक साथ तेस्रो स्थानमा छ ।