एजेन्सी – इन्ज्युरी समयमा आत्मघाती गोल बेहोरेपछि म्यानचेस्टर सिटी इंग्लिस प्रिमियर लिगमा जितबाट वञ्चित बनेको छ । सिटी घरेलु मैदानमै क्रिष्टल प्यालेससँग २–२ गोलको बराबरीमा रोकिदै अंक बाँड्न बाध्य बनेको हो । 

घरेलु मैदान इतिहाद स्टेडियममा सिटीका लागि दुवै गोल सर्जियो अगुइरोले गरे । क्रिस्टलका सेन्क टसनले एक गोल गर्दा एक गोल उपहार पाएको थियो ।

पहिलो हाफमा एक गोलले पछि परेको अवस्थामा दोस्रो हाफमा सर्जियो अगुइरोले दुई गोल गर्दै सिटीलाई जितनजिक पुर्‍याएका थिए । तर, अन्तिम समयमा फनाएन्डिन्होले आत्मघाती गोल गरेपछि सिटी जितबाट वञ्चित बनेको हो ।

खेलको ३९औं मिनेटमा सेन्क टोसनले गोल गर्दै पहिलो हाफमा क्रिष्टल प्यालेसलाई १–० ले अग्रता दिलाएका थिए । १–० ले पछि परेपछि सिटीले लगातार दवावमा राखेपनि क्रिस्टलको बलियो रक्षापङ्ति तोड्न निकै हम्मे हम्मे परेको थियो ।

६ मिनेटको अन्तरमा सर्जियो अगुइरोले दुई गोल गरेपछि सिटीले खेलमा २–१ को अग्रता लिन सफल भएको थियो । अगुइरोले खेलको ८२औं मिनेटमा ग्याब्रिएल जेससको पासमा तथा र ८७औं मिनेटमा बेन्जामिन मेन्डीको पासमा गोल गरेको थियो ।

९०औं मिनेटमा फर्नाडिन्होले आत्मघाती गोल गरेपछि खेल २–२ गोलको बराबरीमा पुग्यो । वेलफ्रेड जाहाको क्रसलाई जोगाउने प्रयास गरेपनि फर्नाडिन्होले आफ्नै पोस्टमा गोल गर्न पुगेका थिए । त्यसपछि थप गोल निस्कन नसक्दा सिटीले प्यालेसलाई अंक बाड्न बाध्य बन्यो ।

बराबरीसँगै सिटी २३ खेलबाट ४८ अंक जोडेर दोस्रो स्थानमा यथावत छ । सिटी दुई खेल कम खेलेको शीर्षस्थानको लिभरपुलसँग १३ अंकले पछि छ । लिभरपुल ६१ अंकसहित शीर्ष स्थानमा छ ।