एजेन्सी – ब्राजिलियन स्टार क्यासमिरोले दुई गोल गरेपछि रियाल म्याड्रिडले स्पेनिस ला लिगामा सेभियामाथि जित निकाल्दै शीर्षस्थानमा उक्लिएको छ । घरेलु मैदान सान्टियागो बर्नबेउमा शनिबार राति भएको खेलमा रियालले सेभियालाई २–१ ले पराजित गर्दै ला लिगाको शीर्षस्थानमा पुगेको हो । 

जितसँगै रियालले २० खेलबाट ४३ अंक जोड्न सफल भयो । रियालले एक खेल कम खेलेको बार्सिलोनालाई ३ अंकले पछि पारेको हो । बार्सिलोनाको १९ खेलबाट ४० अंक छ ।

बार्सिलोनाले आइतबार राति ग्रानडासँग खेल्दैछ । यो खेलमा जित हात पारे बार्सिलोना पुनः शीर्षस्थानमा फर्कनेछ । बराबरी या पराजित भएको अवस्थामा बार्सिलोनाको शीर्षस्थान गुम्नेछ ।

रियालको जितमा दुवै गोल क्यासमिरोले गरे । सेभियाका लुक डि जोङले सान्त्वना गोल फर्काए । सबै तीन गोल दोस्रो हाफमा सम्भव भएको थियो । निकै नै प्रतिस्पर्धात्मक बनेको खेलको पहिलो गोलरहित बराबरीमा सकिएको थियो ।

२६औं मिनेटमा लुका मोड्रिचले गोल गर्ने अवसर खेर फालेका थिए । ३०औं मिनेटमा लुक डि जोङले गोल गरेपनि भिएआरबाट मान्यता पाएन । उनले गोल गर्नुअघि रियालका डिफेन्डर इडर मिलिटाओलाई फउल गरेको देखिएको थियो ।

५७औं मिनेटमा लुका जोभिकको ब्याक हिल पासमा क्यासमिरोले गोल गर्दै घरेलु टोली रियाललाई खेलमा अग्रता दिलाए । ६४औं मिनेटमा सेभियाले बराबरी गोल फर्कायो । मुनिर एल हाद्दादिको पासमा लुक डि जोङले बराबरी गोल फर्काएका थिए । त्यसको ४ मिनेट पछि नै क्यासमिरोले लुकास भास्क्वेजको क्रसमा हेडमार्फत गोल गर्दै रियाललाई खेलमा पुनः २–१ को अग्रता दिलाए ।

७४औं मिनेटमा क्यासमिरो ह्याट्रिकबाट चुके । ८३औं मिनेटमा सेभियाले खेललाई बराबरी गर्ने मौका गुमायो । ८७औं मिनेटमा रियालका भिनिसियस जुनियरको प्रहारलाई सेभियाका गोलरक्षक थोमस भलिकले मुस्किलले बचाए । त्यसपछि थप गोल निस्कन नसक्दा खेल रियालले २–१ ले आफ्नो पक्षमा पार्न सफल भयो ।

अन्य नतिजा

लेगानेसविरुद्ध गेटाफे (०–३)

लेभान्टेविरुद्ध डिर्पाेटिभो अलाभेस (०–१)

एइबारविरुद्ध एट्लेटिको मड्रिड (२–०)