काठमाडौं (हाम्रो खेलकुद) – ललितपुरको रुस्लान थ्री स्टार क्लबले एक भारतीय खेलाडीसहित तीन खेलाडीलाई क्लबमा अनुबन्ध गरेको छ ।

क्लबले भारतको मिजोरम फुटबल संघका कप्तान लालरम्माविया र च्यासल युथ क्लबका पुर्व खेलाडी सन्जोक राई तथा निशान खड्कालाई अनुबन्धित गरेको हो । उनीहरुलाई लिग भरका लागि अनुबन्ध गरिएको क्लबले जनाएको छ ।

लालरम्माविया मिजोरम लिग सकिएलगत्तै थ्री स्टारमा अनुबन्धित भएका हुन् । लालरम्माविया फरवार्ड हुन् । सन्जोक र निशानले गत सिजन च्यासलबाट लिग खेलेका थिए ।

सन्जोक र निशान भने ६ महिनाको कारवाही पुरा गर्दै फुटबलमा फर्कन लागेका हुन् । गत सिजन च्यासलमा अनुबन्धित रहेकै अवस्थामा झापा–११ बाट मोफसल प्रतियोगिता खेलेको कारण उनीहरुलाई ६ महिनाको कारबाही गरिएको थियो ।

अनुबन्धित तीनै खेलाडीले मनाङविरुद्ध शनिबार हुने खेलमा प्रतिस्पर्धा गर्ने सम्भावना रहेको छ । उनीहरु छनोटका लागि उपलब्ध भइसकेका छन् । सन्जोक यसअघि राष्ट्रिय टोलीकै क्याम्पमा समेत परिसकेका थिए ।

औसतको प्रदर्शन गरिरहेको थ्री स्टार मनाङलाई पराजित गर्दै शीर्षस्थानको आर्मी र मछिन्द्रसँगको अंक बराबरी गर्ने लक्ष्यमा हुनेछ । मनाङविरुद्ध जित हात पार्न सके थ्री स्टार उपाधि दावेदारितामा उभिनेछ । पराजित भएके अवस्थामा भने उपाधि यात्रा झिनो बन्नेछ ।

थ्री स्टारसँग कप्तान बिक्रम लामा, अनन्त तामाङ, मिक्छेन तामाङ, गोलरक्षक प्रिसो, रुपेश केसी र सुशिल राई जस्ता खेलाडीहरुको साथ रहेको छ । खेल दिउँसो ३ बजे दशरथ रंगशालामा हुनेछ ।