एजेन्सी – रियल म्याड्रिडका प्रशिक्षक जिनेदिन जिदानलाई फाइनलका विशेषज्ञ भन्दा फरक पर्दैन । फ्रान्सेली जिदानको प्रशिक्षणमा रियलले १० वटामा उपाधि जितेको छ । त्यसमध्येका ९ वटा नकआउट उपाधि हुन् भने एउटा लिग उपाधि जितेको थियो ।

जिदानको नेतृत्वमा खेलेका सबै नकआउटका ९ फाइनलमा रियलले सफलता प्राप्त गरेको छ । सन् २०१६/१७ मा भने उनको टोलीले सिजन भरको प्रदर्शनबाट ला लिगा उपाधि जितेको थियो ।

जिदानको नेतृत्वमा रियलले सन् २०१५/१६ को च्याम्पियन्स लिग फाइनलमा सहरि प्रतिद्वन्द्वि एटलेटिको म्याड्रिडलाई पेनाल्टीमा हराएको थियो । लगत्तै अर्को संस्करणमा युभेन्टसलाई हराउँदै उपाधि जितेको रियलले त्यसपछि लिभरपुललाई हराउँदै उपाधिमा ह्याट्रिक गर्यो ।

रियलले २०१६ मा काशीमा एन्टलर्सलाई पराजित गर्दै क्लब विश्वकप जित्यो । त्यसको अर्को सिजन ग्रेमिओलाई हराउँदै दोस्रो उपाधि पनि रियलले क्लब विश्व कप जित्योे । यूईएफए सुपरकपमा पनि रियलले सेभिल्ला र म्यानचेस्टर युनाइटेडलाई हराउँदै लगातार दुई उपाधि पक्का गर्यो ।

जिदानले बार्सिलोनालाई सन् २०१७ को स्पेनिस सुपर कपको फाइनलमा पराजित गर्दै उपाधि जितेको थियो । पछिल्लो पटक आइतबारको फाइनलमा स्पेनिस सुपर कप एट्लेटिकोलाई हराउँदै जिदानले रियलसँग दशौं उपाधि जितेका छन् । यो सँगै उनले लगातार ९ फाइनल जित्ने सफलता पनि प्राप्त गरेका छन् । त्यसअर्थ जिदानलाई फाइनलको राजा भन्दा फरक पर्दैन ।

जिदानको प्रशिक्षणमा रियलले जितेको उपाधि

ला लिगा – २०१६/१७

स्पेनिस सुपर कप – २०१७,२०१९/२०

युइएफए च्याम्पियन्स लिग – २०१५/१६,२०१६/१७,२०१७/१८

युइएफए सुपर कप –२०१६,२०१७

फिफा क्लब विश्व कप –२०१६,२०१७