एजेन्सी – अर्जेन्टिनी फरवार्ड सर्जियो अगुइरोको कीर्तिमानी ह्याट्रिक सहयोगमा म्यानचेस्टर सिटीले इंग्लिस प्रिमियर लिगमा फराकिलो जित निकालेको छ ।

आइतबार राति भएको खेलमा सिटीले एस्टन भिल्लालाई उसकै मैदानमा ६–१ को फराकिलो जित निकालेको हो । सिटीको फराकिलो जितमा सर्जियो अगुइरोले ह्याट्रिक तथा रियाद महरेजले दुई गोल गर्दा ग्राबियल जिससले एक गोल गरे । एस्टनका अनवर एल घाजीले एक गोल फर्काए ।

गोलको वर्षा भएको खेलको १८औं मिनेटमा महारेजले गोल गर्दै सिटीलाई सुरुवाती अग्रता दिलाए । २४औं मिनेटमा महारेजले व्यक्तिगत दोस्रो गोल गर्दै सिटीको अग्रता दोब्बर बनायो । २८औं मिनेटमा अगुइरोले गोल गर्दै सिटीलाई खेलमा ३–० ले अघ बढाए । त्यसपछि ४५ औं मिनेटमा जिससले गोल गर्दा पहिलो हाफमै सिटीले ४–० को आरामदायी अग्रता बनायो ।

दोस्रो हाफमा सिटीले थप दुई गोल गर्दा एक गोल खान पुग्यो । ५७औं मिनेटमा अगुइरोले व्यक्तिगत दोस्रो गोल गर्दै सिटीलाई ५–० ले अघि बढाए । ८१औं मिनेटमा अगुइरोले ह्याट्रिक पुरा गर्दा सिटीलाई ६–० को अग्रता दिलाए ।

यससँगै अगुइरो प्रिमियर लिगमा सर्वाधिधक गोल गर्ने इंग्ल्यान्ड बाहिरका खेलाडी बने । एस्टनविरुद्ध ह्याट्रिक गोल गरेसँगै अग्युरोले प्रिमियर लिगमा आफ्नो गोल संख्या १ सय ७७ बनाए । अगुइरोले फ्रान्सका थिएरी हेनरीको १ सय ७५ गोलको कीर्तिमान तोडेका हुन् ।

प्रिमियर लिगमा अगुइरोको करियरको १२औं ह्याट्रिक हो । यससँगै अगुइइरोले प्रिमियर लिगमा सर्वाधिक ह्याट्रिक गर्ने खेलाडी एलन शेयररको कीर्तिमान समेत तोडेका छन् । यस अघि शेयररले ११ ह्याट्रिकको कीर्तिमान बनाएका थिए । त्यसपछि खेलको इन्जुरी समयमा एस्टनका घाजीले पेनाल्टीमा एक गोल फर्काएपनि सिटीले ६–१ को जित निकाल्यो ।

जितसँगै सिटी लिगको दोस्रो स्थानमा उक्लिएको छ । सिटीले २२ खेलमा ४७ अंक जोडेको छ । तर, सिटी शीर्ष स्थानको लिभरपुल भन्दा अझै १४ अंकले पछि छ । लिभरपुलको ६१ अंक रहेको छ । एस्टन २१ अंकसहित १८औं स्थानमा  छ ।