एजेन्सी – सुपर स्टार फरवार्ड क्रिस्टियानो रोनाल्डोको गोलसँगै युभेन्ट्सले इटालिन सिरी ‘ए’ मा जित निकाल्दै लिगको शीर्षस्थानमा उक्लन सफल भएको छ ।

युभेन्ट्सले रोमालाई उसकै मैदानमा २–१ को कठिन जित निकाल्दै इन्टर मिलानलाई २ अंकले पछि पार्दै शीर्ष स्थानमा उक्लन सफल भएको हो ।  जितपछि युभेन्ट्सको १९ खेलबाट ४८ अंक पुगेको छ । समान खेलबाटै इन्टर मिलानको ४६ अंक छ । इन्टर शनिबार राति एटलान्टासँग १–१ गोलको बराबरीमा रोकिएको थियो । रोमा ३५ अंकसहित पाँचौ स्थानमा यथावत छ ।

स्टेडियो ओलम्पिको रोमामा आइतबार राति भएको खेलमा युभेन्ट्सको जितमा मेरिह डेमिरल र रोनाल्डोले गोल गरे । घरेलु टोलीका डिएगो पेरोटीले सान्त्वना गोल फर्काए ।  खेलको तेस्रो मिनेटमा नै मेरिह डेमिरलले गोल गर्दै युभेन्ट्सलाई शुरुवाती अग्रता दिलाएका थिए । पिजानिकको फ्रिकिकलाई मेरिह डेमिरले गोलमा परिणत गरेका थिए ।

१०औं मिनेटमा रोनाल्डोले गोल गर्दै युभेन्ट्सको अग्रता दोब्बर बनायो । रोमाका जोर्डन भेरेटाउटले युभेन्ट्सका पाउलो डिबालालाई बक्समा लडाएपछि युभेन्ट्सको पेनाल्टीको मौका पाएको थियो । जसलाई रोनाल्डोले कुनै गल्ती गरेनन् ।

१३औं मिनेटमा घरेलु टोली रोमाले गोल अन्तर कम गर्ने अवसर खेर फाल्यो । लोरेन्जो पेलिग्रेनीको प्रहार बाहिरियो । १८औं मिनेटमा पेलिग्रनीकै लो क्रसलाई युभेन्ट्सका गोलरक्षकले बचाएपनि रिवाउन्डमा रेबिओटले ब्लक गरिदिए । ३६औं मिनेटमा एलेक्सजेन्डर कोलारोभको प्रहार आकासियो । पहिलो हाफको शुरुमै दुई गोलको अग्रता लिएको युभेन्ट्सले उल्लेख्य मुभ बनाउन सकेन ।

६६औं मिनेटमा रोमाले अर्काे अवसर खेर फाल्यो । कोलारोभको क्रसलाई एलेक्स सान्द्रोले गोललाईनबाट क्लियर गरिदिए । त्यसमै भिएआरको सहायता लिदा एलेक्स सान्द्रोको ह्यान्ड देदिएपछि रोमाले पेनाल् टीको मौका पाएको थियो । जसलाई ६८औं मिनेटमा डिएगो पेरोटीले गोल गर्दै खेललाई २–१ को अवस्थामा ल्याए ।

७९औं मिनेटमा युभेन्ट्सका गोन्जलो हिगुआइनले गोल गरेपनि मान्यता पाएन । इन्ज्युरी समयको थप गरिएको पहिलो मिनेटमा रोमाले बराबरी गोल गर्ने सुन्दर मौका खेर फाल्यो । इन्ज्युरी समयको थप गरिएको पाँचौ मिनेटमा हिगुआइन पुन चुके ।  त्यसपछि थप गोल निस्कन नसक्दा युभेन्ट्स २–१ ले विजयी हुन सफल भयो ।