काठमाडौं (हाम्रो खेलकुद) – सरस्वती युथ क्लबले कतार एयरवेज सहिद स्मारक ए डिभिजन लिगमा पहिलो अंक जोडेको छ । दशरथ रंगशालामा आइतबार भएको खेलमा ब्रिगेड ब्वाइज क्लब (बिबिसी) सँग गोलरहित बराबरी खेल्दै सरस्वती क्लबले छैटौं खेलमा पुगेर पहिलो अंक जोडेको हो ।

यसअघि ५ खेलमै सरस्वतीले हार बेहोरेको थियो । राष्ट्रिय फुटबल टोलीका पूर्व कप्तानको नेतृत्वमा रहेको बिबिसीको खातामा भने ७ अंक पुगेको छ । यसअघिका ५ खेलमा बिबिसीले २ खेल जितेको थियो ।

त्यसअघि आजै उपाधि दाबेदारका रुपमा हेरिएको रुस्लान थ्री स्टार क्लब कतार अर्को ललितपुरे क्लब एनआइबिएल फ्रेन्ड्ससँग स्तब्ध भएको छ । थ्री स्टारलाई १–० ले पराजित गर्दै फ्रेन्ड्सले लिगमा पहिलो जित जित दर्ता गराएको हो । लिगमा थ्री स्टारको भने यो दोस्रो हार हो । यो हारले अंक तालिकाको दोस्रो स्थानमा उक्लने मौका थ्री स्टारले गुमाएको छ । ६ खेलमा टोलीको खातामा १० अंक छ ।

यसअघि टोली त्रिभुवन आर्मी क्लबसँग २–० ले निराश भएको थियो । फ्रेन्ड्सका ब्राजिलियन वेङ्गर डि काम्रोले १३ औं मिनेटमा गरेको गोल खेलको निर्णायक बनेको थियो । शीर्षस्थानको मछिन्द्रको ६ खेलबाट १३ अंक छ । १२ अंक जोडेको आर्मी र मनाङ दोस्रो र तेस्रो स्थानमा रहेको छ । ६ खेलमा फ्रेन्ड्सको ५ अंक पुगेको छ ।

लिगमा सोमबार २ खेल हुनेछन् । दिउँसो १२ बजे एनआरटी र नेपाल पुलिस क्लब तथा दिउँसो ३ बजे च्यालस युथ क्लब र नेपाल एपिएफ क्लबबीच प्रतिस्पर्धा हुनेछ ।